‘कारगिल दिन’ जवानांच्या शौर्याचे प्रतीक

80318

‘कारगिल दिन’ जवानांच्या शौर्याचे प्रतीक

प्रकाश शिंदे ः खारेपाटण महाविद्यालयात व्याख्यानास प्रतिसाद

सकाळ वृत्तसेवा
तळेरे, ता. २७ : भारतीय सैन्याच्या शौर्याचा आणि बलिदानाचा गौरव करणारा दिन म्हणजे कारगिल विजय दिवस होय. देशाच्या विकासासाठी राष्ट्रीय एकात्मता, सामाजिक बांधिलकी आणि सेवाभावी वृत्ती आवश्यक आहे, असे प्रतिपादन शेजवली (ता. राजापूर) गावचे पोलिसपाटील प्रकाश शिंदे यांनी केले.
कारगिल विजय दिनानिमित्त खारेपाटण महाविद्यालयाच्या राष्ट्रीय सेवा योजना विभाग, एनसीसी विभाग आणि विद्यार्थी कल्याण समिती व सांस्कृतिक विभाग यांच्या संयुक्त विद्यमाने विशेष व्याख्यानाचे आयोजन महाविद्यालयात करण्यात आले होते. यावेळी मार्गदर्शन करताना श्री. शिंदे बोलत होते. या कार्यक्रमास प्रमुख पाहुणे मुंबई विद्यापीठाच्या राष्ट्रीय सेवा योजना विभागाचे सिंधुदुर्ग जिल्हा समन्वयक प्रा. वसीम सय्यद उपस्थित होते. महाविद्यालयाचे प्राचार्य डॉ. ए. डी. कांबळे यांच्या अध्यक्षतेखाली हा कार्यक्रम झाला.
या कार्यक्रमास महाविद्यालयातील एनएसएस, एनसीसी, सांस्कृतिक विभाग व विद्यार्थी कल्याण समितीचे समन्वयक, स्वयंसेवक आणि विद्यार्थी मोठ्या संख्येने उपस्थित होते. कारगिल विजय दिनाच्या निमित्ताने जवानांच्या अमर शौर्याला वंदन करून राष्ट्रसेवेची नवी शपथ विद्यार्थ्यांनी घेतली. कार्यक्रमाचे प्रभावी प्रास्ताविक सिद्धी शेलार हिने केले. प्रथमेश हरियाण याने सूत्रसंचालन केले. कुमारी पवार हिने आभार मानले.
----
विद्यार्थ्यांमध्ये राष्ट्रनिष्ठा केली जागृत
यावेळी शिंदे यांनी, कारगिल रणसंग्राम व भारतीय जवानांचे पराक्रम, शौर्य आणि मातृभूमीवरील प्रेम याबद्दल सखोल मार्गदर्शन केले. प्राचार्य डॉ. कांबळे यांनी आपल्या भाषणातून विद्यार्थ्यांमध्ये राष्ट्रनिष्ठा व कर्तव्यभावना जागृत केली. यावेळी एनएसएस विभागाच्या कार्यक्रम अधिकारी प्रा. रश्मी देसाई यांनी विद्यार्थ्यांना सेवा, शिस्त आणि नेतृत्वगुणांची गरज पटवून दिली. प्रा. तानाजी गोदडे यांनी देशरक्षणासाठी युवकांची भूमिका स्पष्ट करताना कर्तव्यपरायणतेचे महत्त्व अधोरेखित केले.