रोज रानभाज्या खा, सदृढ राहा

80333

रोजच्या आहारात रानभाज्यांचा समावेश करा

सचिन जाधव ः केळकर हायस्कूलमध्ये प्रदर्शन, विक्री

सकाळ वृत्तसेवा
देवगड, ता. २७ ः वाडा (ता. देवगड) येथील अ. कृ. केळकर हायस्कूलमध्ये रानभाज्या प्रदर्शन व विक्री उपक्रमाचे आयोजन करण्यात आले होते. याला पालकांकडून प्रतिसाद मिळाला. रानभाज्यांचा समावेश आपल्या रोजच्या आहारात आवश्यक असल्याचे मत येथील जिल्हा परिषद शाळेचे उपक्रमशील शिक्षक सचिन जाधव यांनी यावेळी व्यक्त केले.
याचे उद्‍घाटन सचिन जाधव यांच्या हस्ते झाले. यावेळी मुख्याध्यापिका सौ. स्मिता तेली, स्थानीय समिती अध्यक्ष शांताराम पुजारे, शाला समिती अध्यक्ष हर्षद जोशी, स्थानीय समिती कोषाध्यक्ष सतीश रुमडे, शाळा समिती सदस्य महेंद्र मांजरेकर, माजी पर्यवेक्षिका सौ. उल्का जोशी आदी उपस्थित होते. श्री. जाधव यांनी, रानभाज्यांचे महत्त्व सांगून या रानभाज्यांचा समावेश विद्यार्थ्यांच्या रोजच्या आहारातही असावा असे सांगितले. या उपक्रमात सुमारे ६० ते ६५ विद्यार्थी सहभागी झाले होते. विद्यार्थ्यांनी काटली, फोडशी, भारंगी, सुरण, केळफूल, बासमती पात, नारळ, लवंग, गरे, आमरस, नारळाच्या वड्या, कोकम आदी अनेक भाज्या व गावठी उत्पादने विक्रीसाठी आणली होती. या उपक्रमास विद्यार्थी, पालक, माजी विद्यार्थी यांचा मोठा प्रतिसाद लाभला. आकाश तांबे यांनी सूत्रसंचालन केले. भूषण दातार यांनी आभार मानले.