-विद्यार्थ्यांनी अभ्यासाबरोबर शेतीकडे लक्ष द्या

विद्यार्थ्यांनो अभ्यासासह शेतीकडे लक्ष द्या
सहदेव बेटकर ः जावडे येथील हेरिटेज संस्थेचे काम प्रेरणादायी
सकाळ वृत्तसेवा
लांजा, ता. ३० ः आपण शेतकऱ्यांची मुले आहोत म्हणून स्वतःला कधी कमी समजू नका. शेतकरी हाच जगाचा पोशिंदा आहे म्हणूनच विद्यार्थ्यांनीदेखील अभ्यासाबरोबरच शेतीकडे लक्ष देऊन स्वतःच्या क्षमता ओळखल्या पाहिजेत व सातत्याने प्रयत्न करून जीवनात यशस्वी झाले पाहिजे. जावडेसारख्या हेरिटेज संस्थेने ग्रामीण भागात शोषित व वंचित घटकातील विद्यार्थ्यांसाठी केलेले शैक्षणिक काम प्रेरणादायी आहे, असे प्रतिपादन जिल्हा परिषदेचे माजी शिक्षण सभापती व उद्योजक सहदेव बेटकर यांनी केले.
जावडे येथे आयोजित कार्यक्रमात ते बोलत होते. अमेरिकेअर इंडिया फाउंडेशन आणि शिवस्वराज्य फाउंडेशन यांच्यावतीने हेरिटेज कल्चर आर्ट अँड एज्युकेशन डेव्हलपमेंट सोसायटी संचलित प्राथमिक व माध्यमिक आश्रमशाळेतील विद्यार्थ्यांना मोफत ब्लॅंकेट, टॉवेल व अन्य जीवनावश्यक वस्तूंचे वाटप करण्यात आले. या वेळी हेरिटेज संस्थेचे संस्थापक तथा मुख्य कार्यकारी अधिकारी संतोष कांबळे, उद्योजक सचिन माजलकर, शिवस्वराज्य फाउंडेशनचे संस्थापक प्रताप पवार, अध्यक्ष चंद्रशेखर धावणे, सचिव किशोर सावंत, कार्याध्यक्ष दिनेश पवार, शिवसेनेचे लांजा तालुकाप्रमुख सुरेश करंबळे, युवा उद्योजक अमेय विश्वासराव, सामाजिक कार्यकर्ते विश्वास मांडवकर, मुख्याध्यापक गजानन पांचाळ, न्यू इंग्लिश स्कूल जावडेचे मुख्याध्यापक संदेश कांबळे आदी उपस्थित होते.
या वेळी उद्योजक बेटकर यांनी हेरिटेज संस्थेच्या विविध शैक्षणिक उपक्रमासाठी आर्थिक मदत म्हणून पन्नास हजार रुपयांचा धनादेश दिला. सूत्रसंचलन विद्धेश फणसे यांनी केले.
----