झाराप केंद्रशाळा क्र. १ मध्ये रानभाज्या प्रदर्शनास प्रतिसाद

80980

झाराप केंद्रशाळा क्र. १ मध्ये
रानभाज्या प्रदर्शनास प्रतिसाद
सकाळ वृत्तसेवा
कुडाळ, ता. ३० ः डॉ. बाळासाहेब सावंत कोकण कृषी विद्यापीठ, दापोली मान्यताप्राप्त छत्रपती शिवाजी कृषी महाविद्यालय, किर्लोस-ओरोस येथील कृषिकन्यांच्या पुढाकाराने झाराप येथील केंद्रशाळा क्र. १ येथे रानभाज्यांचे प्रदर्शन व पाककला स्पर्धा यांचे आयोजन करण्यात आले.
या कार्यक्रमाचे आयोजन प्राचार्य प्रा. भेंडे, प्रा. गोपाळ गायकी, प्रा. भावना पाताडे, प्रा. महेश परुळेकर, प्रा. प्रसाद ओगले यांच्या मार्गदर्शनाखाली करण्यात आले. त्यांच्या प्रेरणेतून प्रतीक्षा पाटील, साक्षी ठाकूर, अनस्वरा के. उदय, रिफाना फातिमा, शिवरंजिनी आर. या कृषिकन्यांनी कार्यक्रमाचे आयोजन व प्रभावी संचालन केले. कार्यक्रमात टाकळा, अळूची पानं, कडवीचिंच, करडई, माठ यांसारख्या पारंपरिक रानभाज्यांचे प्रदर्शन लावण्यात आले. त्याच रानभाज्यांचा वापर करून विविध चविष्ट व पौष्टिक पारंपरिक पदार्थांची पाककला स्पर्धा घेण्यात आली.
या कार्यक्रमात शाळेचे मुख्याध्यापक प्रा. शिरोडकर, गावकरी अमोल तेली, सरपंच दक्षता मेस्त्री, कृषी सहायक जागृती शेट्ये यांची उपस्थिती व सहकार्य लाभले. गावकऱ्यांनी उत्स्फूर्त सहभाग नोंदवत रानभाज्यांविषयी माहिती घेतली व कृषिकन्यांचे कौतुक केले. रानभाज्यांचे पोषणमूल्य, औषधी उपयोग व स्थानिक अन्नसंस्कृती जनसामान्यांपर्यंत पोहोचवण्याच्या दृष्टीने हा उपक्रम उपयुक्त ठरला.