वाटद-कवठेवाडी शाळेत वृक्षारोपण

वाटद-कवठेवाडी शाळेत वृक्षारोपण
सकाळ वृत्तसेवा
जाकादेवी, ता. ३१ ः ‘एक पेड माँ के नाम’ या अभियानांतर्गत वाटद-कवठेवाडी शाळेतील विद्यार्थ्यांनी घरातील मोकळ्या जागेत रोपांची लागवड करून ती जगवण्याचा निर्धार केला तसेच आपल्या नावाचे फलक तयार करून त्या झाडांपुढे लावले गेले. आठवडाभर हा उपक्रम राबवण्यात आला.
घराच्या परिसरात लावण्यात आलेल्या झाडांचे फोटो इकोक्लब फॉर मिशन लाईफ या ठिकाणी अपलोड केले. त्यानुसार या सर्व विद्यार्थ्यांना विशेष कार्यक्रमात प्रमाणपत्र देऊन सन्मानित करण्यात आले. या प्रसंगी अप्पा धनावडे म्हणाले, वाढत्या प्रदूषण आणि बदलत्या पर्यावरणाच्या काळात विद्यार्थ्यांना पर्यावरणाचे, वृक्षारोपणाचे महत्त्व समजण्यासाठी हा उपक्रम उपयुक्त ठरणार आहे. हा उपक्रम गटशिक्षणाधिकारी डॉ. दत्तात्रय सोपनूर, गणपतीपुळे प्रभागाच्या शिक्षणविस्तार अधिकारी सविता तोटावार, केंद्रप्रमुख संतोष मोहिते यांच्या मार्गदर्शनाखाली शाळेचे मुख्याध्यापक माधव अंकलगे, उपशिक्षक राधा नारायणकर यांनी शालेय व्यवस्थापन समितीच्या सहकार्याने केला.