सारंग यांच्या ‘त्या’ आव्हानाला परब यांचे ४८ तासांत प्रत्युत्तर

81503

सारंग यांच्या ‘त्या’ आव्हानाला
परब यांचे ४८ तासांत प्रत्युत्तर

भाजपचे चौघे पक्षप्रवेशास इच्छुक असल्याचा दावा

सकाळ वृत्तसेवा
सावंतवाडी, ता. १ ः भाजप जिल्हा सरचिटणीस महेश सारंग यांनी शिंदे शिवसेनेचे जिल्हाप्रमुख संजू परब यांना आठ दिवसांत भाजप फोडण्याचे आव्हान दिले होते. याला श्री. परब यांनी केवळ ४८ तासांतच प्रत्युत्तर देत सारंग यांच्याच बालेकिल्ल्यातील भाजपच्या विद्यमान चार ग्रामपंचायत सदस्यांना पत्रकार परिषदेमध्ये उपस्थित करत जोरदार झटका दिला. चारही ग्रामपंचायत सदस्यांनी परब यांच्या नेतृत्वात शिंदे शिवसेनेमध्ये प्रवेश करण्यात इच्छुक असल्याचे यावेळी स्पष्ट केले. त्यामुळे सावंतवाडी मतदारसंघात महायुतीमध्ये पक्षप्रवेशावरून वातावरण तापण्याची शक्यता आहे.
श्री. परब यांनी आज आपल्या संपर्क कार्यालयात पत्रकार परिषद घेत श्री. सारंग यांच्या आव्हानाला उत्तर दिले. श्री. सारंग यांनी आधी आपला गाव सांभाळावा. जो आपला गाव सांभाळू शकत नाही, तो मतदारसंघ आणि तालुका तरी काय सांभाळणार? अशी कोपरखळी मारत टीकाही केली. यावेळी तालुकाप्रमुख बबन राणे तसेच कोलगावचे विद्यमान ग्रामपंचायत सदस्य कोलगाव ग्रामपंचायतचे सदस्य रोहित नाईक, आशिका सावंत, प्रणाली टीळवे, संयोगिता उगवेकर हे उपस्थित होते.
श्री. परब म्हणाले, ‘माझे मित्र सारंग यांनी मला भाजप फोडण्याचे आव्हान दिले होते, तसेच माझ्यावर टीकाही केली होती. मात्र, त्यांच्या या टीकेला मी उत्तर देणार नव्हतो. मात्र, पक्षातीलच काही कार्यकर्त्यांनी केलेल्या विनंतीला मान देऊन सारंग यांच्या टीकेला उत्तर दिले. माझे नेते दीपक केसरकर यांच्या शब्दाला मान देऊन आज गप्प आहे; अन्यथा माझ्याकडे आज तालुक्यातील भाजपचे ११६ ग्रामपंचायत सदस्य शिंदे शिवसेनेमध्ये येण्यास इच्छुक आहेत. मात्र, कोणी आव्हान दिल्यास गप्प बसणार नाही. मला यासंदर्भात कुठल्याही नेत्याने फोन करण्याचा प्रयत्नही करू नये. केवळ केसरकर यांच्या शब्दाला लागून आणि महायुतीचा धर्म पाळून गप्प आहे, नाहीतर आजच या चारही ग्रामपंचायत सदस्यांचा प्रवेश घेतला असता. सारंग यांनी हे लक्षात घ्यावे, उगाच माझ्या नादी लागू नये.’