जिल्ह्यात ‘जलजीवन’ची कामे अपूर्ण

81515

जिल्ह्यात ‘जलजीवन’ची कामे अपूर्ण

आमदार नीलेश राणे ः प्रलंबित विषय मार्गी लावण्याची सीईओंची ग्वाही

सकाळ वृत्तसेवा
ओरोस, ता. १ ः जिल्ह्यातील जलजीवनांतर्गत कामांची स्थिती योग्य नाही. झालेल्या कामाची बिले ठेकेदारांना मिळालेली नाहीत. अनेक कामांची बिले मिळाली. मात्र, कामे योग्य नाहीत. असंख्य कामे अपूर्ण आहेत. यासाठी तालुकानिहाय बैठका घेऊन कामे त्वरित पूर्ण करावीत. तसेच जिल्हा परिषद शाळांच्या तत्काळ दुरुस्त्या कराव्यात आदींसह विविध विकासकामांबाबत आमदार नीलेश राणे यांनी जिल्हा परिषदेचे मुख्य कार्यकारी अधिकारी रवींद्र खेबुडकर यांच्यासोबत सविस्तर चर्चा केली.

आमदार राणे यांची गुरुवारी (ता.३१) सिंधुदुर्ग जिल्हा परिषद कार्यालय येथे जिल्हा परिषद मुख्य कार्यकारी अधिकारी खेबुडकर यांच्यासोबत सकारात्मक बैठक झाली. या बैठकीस शिवसेनेचे उपनेते संजय आग्रे, जिल्हाप्रमुख संजू परब, दादा साईल, काका कुडाळकर, बाबा परब आदी उपस्थित होते. या बैठकीत कुडाळ-मालवण तालुक्यातील प्रलंबित विकासकामांबाबत सविस्तर चर्चा करण्यात आली. सिंधुदुर्ग जिल्ह्यात जल जीवन मिशनअंतर्गत मोठ्या प्रमाणात कामे झाली. मात्र, ती व्यवस्थित झाली नाहीत. काही कामे पूर्ण झाली; मात्र त्यांचे बिल ठेकेदारांना मिळाले नाही. बिले मिळाली. मात्र, झालेली कामे योग्य नाहीत, आदी विषय आमदार राणे यांनी सीईओ यांच्यासमोर ठेवले आणि जलजीवन मिशनअंतर्गत अपूर्ण कामांचा आढावा घेण्यासाठी तालुकानिहाय बैठक घेऊन कामे त्वरित पूर्ण करा अशा सूचना दिल्या. ग्रामपंचायत कर्मचाऱ्यांचे तीन महिन्यांपासून वेतन मिळाले नसून ते गणेशोत्सवापूर्वी मिळावे यासाठी प्रयत्न करा, असे आमदार राणे यांनी सांगितले. यावर प्रलंबित वेतन देण्यासाठीची प्रक्रिया सुरू असून चार दिवसांत अदा करण्यात येतील, अशी माहिती मुख्य कार्यकारी अधिकारी यांनी दिली. सर्व विषयांवर सकारात्मक चर्चा होऊन ते तातडीने मार्गी लावले जातील, अशी ग्वाही श्री. खेबुडकर यांनी दिली. यावेळी त्यांच्यासोबत उपमुख्य कार्यकारी अधिकारी जयप्रकाश परब उपस्थित होते.
--------------
गणेशोत्सवापूर्वी रस्ते सुधारा
गणेशोत्सव काही दिवसांवर आला आहे. मात्र, जिल्ह्यातील रस्ते खड्डेमय झाले आहेत. हे रस्ते गणपतीपूर्वी खड्डेमुक्त व्हावेत यासाठी सुमारे चार कोटी रुपये एवढा खर्च असल्याचे श्री. खेबुडकर यांनी आमदार राणे यांना सांगितले. यावेळी जिल्ह्यातील पालकमंत्र्यांसह आम्हा दोन्ही आमदारांकडून प्रत्येकी एक-एक कोटी रुपये घेऊन हे सर्व रस्ते गणपतीपूर्वी खड्डे मुक्त करावेत, असे सांगत आपल्या आमदार निधीतून एक कोटीची रक्कम जिल्हा परिषदेला देण्याचे आश्वासन दिले.
-------------
शाळांच्या दुरुस्ती जलदरीत्या करा
जिल्ह्यातील बऱ्याच शाळा नादुरुस्त असून, यामुळे विद्यार्थी कुणाच्यातरी अंगणात किंवा झाडाखाली शिक्षण घेत आहेत. हे योग्य नाही. त्यामुळे शाळा दुरुस्ती आणि नवीन वर्गखोली बांधकाम जलदगतीने करण्यावर भर द्यावा, अशी सूचना आमदार राणे यांनी दिली.