सिंधुदुर्गात ५० हजार वृक्षारोपणाचा संकल्प

82276

सिंधुदुर्गात ५० हजार वृक्षारोपणाचा संकल्प
रविशंकर डोकोजूः काळसेत शेतकरी, विद्यार्थ्यांना फळझाडांचे वितरण
सकाळ वृत्तसेवा
कुडाळ, ता. ५ः धरणीमातेचे ऋण व्यक्त करण्यासाठी ‘डोकोजू धन्यवाद’ उपक्रम हाती घेतला आहे. सिंधुदुर्ग जिल्ह्यातील ग्रामीण भागात पाच वर्षांत ५० हजार वृक्षारोपण करण्याचा संकल्प रविशंकर डोकोजू फाउंडेशन बंगळूर व रोटरी क्लब ऑफ कुडाळकडून पूर्ण करणार असल्याची माहिती बंगळूरचे फाउंडेशनचे अध्यक्ष रविशंकर डोकोजू यांनी दिली. काळसे (ता. मालवण) गावातील माऊली मंदिर येथील शेतकऱ्यांना व शालेय विद्यार्थ्यांना फळझाडे रोप वितरण कार्यक्रमात ते बोलत होते.
यावेळी कुडाळ रोटरी क्लबचे अध्यक्ष राजीव पवार, असिस्टंट गव्हर्नर सचिन मदने, डोकोजू फाउंडेशनचे नील जोसेफ, गजानन कांदळगावकर, राजन बोभाटे, कुडाळ रोटरी क्लबचे सचिव मकरंद नाईक, खजिनदार राकेश म्हाडदळकर, एकनाथ पिंगुळकर, नीता गोवेकर, रवींद्र परब, रोटरी क्लब ऑफ सिंधुदुर्ग सेंट्रल सचिव दीपक आळवे, खजिनदार प्रथमेश सावंत, काळसे सरपंच विशाखा काळसेकर, सुधेंद्र डोकोजू, वयंम फॉरेस्ट नर्सरीचे प्रथमेश काळसेकर, ‘सेमंथक’चे मोहमद शेख, माऊली देवस्थानचे विष्णू प्रभू आदी मान्यवर उपस्थित होते.
रविशंकर डोकोजू यांनी रोटरी फाउंडेशनला १०० कोटी रुपये दान करून नवा आदर्श निर्माण केला आहे. गोवा व सिंधुदुर्गमध्ये १ लाख वृक्षारोपण करून झाडे जगवण्याचा संकल्प केलेला आहे. यासाठी कुडाळ रोटरी क्लबचे सहकार्य त्यांना लाभत असल्याचे मत कांदळगावकर यांनी व्यक्त केले.
सरपंच काळसेकर यांनी ‘डोकोजू धन्यवाद’ उपक्रम शेतकऱ्यांसाठी प्रेरणादायी असून, डोकोजू व रोटरी क्लब ऑफ कुडाळचे मनापासून धन्यवाद व्यक्त केले. यावेळी काळसे हायस्कूलच्या शालेय विद्यार्थ्यांना फळझाडेरोप वितरित करण्यात आली. धामापूर येथील प्रसिद्ध सेमंथक या संस्थेला डोकोजू यांनी सदिच्छा भेट घेतली. कोकणातील प्राचीन संस्कृतीची माहिती ‘सेमंथक’चे शेख यांच्याकडून घेत संस्थेचे विशेष कौतुक केले. सूत्रसंचालन सचिन मदने यांनी केले. आभार राजीव पवार यांनी व्यक्त केले.