लागवड

शाळा, समाज मंदिर परिसरात वृक्ष लागवड
उदय संसारेंचा पुढाकार ; `झाडे लावा, झाडे जगवा’चे आवाहन
सकाळ वृत्तसेवा
संगमेश्वर, ता. ५ ः संगमेश्वर बाजारपेठेतील ज्येष्ठ सामाजिक कार्यकर्ते उदय संसारे यांनी पुढाकार घेऊन समाजात पर्यावरण जागृतीचे बीज पेरण्यासाठी वृक्ष लागवडीवर भर दिला आहे. शाळा, मंदिर परिसरात झाडे लावण्यासाठी संसारे यांनी ग्रामस्थांना मोफत रोपं दिली आहेत.
उदय संसारे यांनी ७१ व्या वाढदिवसानिमित्त दोन टप्प्यांत झाडांचे वाटप केले. या उपक्रमांतर्गत स्थानिक समाज मंदिरे, ग्रामदेवता मंदिरे, हायस्कूल, महाविद्यालये तसेच ज्येष्ठ नागरिकांना त्यांच्या परिसरात लागणारी झाडे विनामूल्य पुरवण्यात आली आहेत. ते केवळ झाडे देऊन थांबले नाहीत तर ती झाडे का लावायची, त्याचे पर्यावरणीय महत्त्व काय आहे यावरही त्यांनी प्रबोधन केले आहे. नवनिर्माण महाविद्यालयाला रोपांची भेट देऊन श्री. संसारे यांनी वृक्षारोपण उपक्रमाला चालना दिली. यावेळी महाविद्यालयात बॉटनिकल गार्डन तयार करण्यासाठी लागणारी झाडेही सुपूर्द केली आहेत. त्यामुळे महाविद्यालयात एक सुसज्ज बॉटनिकल गार्डन उभे राहिले आहे. वृक्षारोपण कार्यक्रमावेळी व्यापारी संघटनेचे अध्यक्ष बापू भिंगार्डे, उदय मुळ्ये, भिकाजी साळवी, संदेश कापडी, विजय पवार, गणपती नाझरे, प्रमोद शेट्ये, अध्यक्ष विनायक पाथरे, विनोद मुळ्ये, दिलीप प्रभावळकर कर्मचारीवर्ग उपस्थित होता.