जमिनीच्या मोबदल्यासाठी आज मुंबईत बैठक

जमीन मोबदल्यासंदर्भात आज मुंबईत बैठक
गुहागर-विजापूर राष्ट्रीय महामार्ग; पालकमंत्र्यांचा पुढाकार
सकाळ वृत्तसेवा
चिपळूण, ता. ५ : गुहागर-विजापूर राष्ट्रीय महामार्ग चौपदरीकरणाचे काम २०१७ मध्ये सुरू करून आठ वर्षे झाली; मात्र रस्त्यासाठी ज्या शेतकऱ्यांनी जागा दिली त्यांना जमिनीचा मोबदलाच मिळालेला नाही. याप्रकरणी पालकमंत्री उदय सामंत यांनी उद्या (ता. ६) मंत्रालयात तातडीची बैठक बोलावली आहे. या बैठकीला राष्ट्रीय महामार्ग विभागाचे अधिकारी, चिपळूण प्रांताधिकारी तसेच अन्य संबंधित खात्यांचे अधिकारी उपस्थित राहणार आहेत.
गुहागर-विजापूर महामार्गाचे चौपदरीकरण २०१७ मध्ये सुरू झाले. त्या आधी संबंधित परिसरात भूसंपादन प्रक्रिया झाली. या रस्त्यासाठी ठेकेदारही नेमण्यात आला आहे. संबंधित ठेकेदाराने सिमेंट काँक्रिटचा रस्ता बनविण्याचे काम हाती घेतले. काम सुरू होताच संघर्ष समिती आणि अन्याय निवारण समितीने प्रथम मोबदला मग काम, अशी भूमिका घेतली. त्यानंतर ३० नोव्हेंबर २०१७ रोजी प्रांत कार्यालयात शेतकऱ्यांसोबत बैठक झाली. त्यात प्रशासनाने शेतकऱ्यांना मोबदला मिळेल, अशी ग्वाही दिली आणि दुसऱ्याच दिवशी कामाला सुरुवात झाली. राष्ट्रीय महामार्ग विभागाकडून मोबदला देणार आहे, अशीच भूमिका घेतली होती. कामाला प्रत्यक्ष सुरुवात झाली तरीही मोबदला मिळालेला नाही. त्यामुळे आता व्याजासह मोबदला द्या, अशी मागणी शेतकऱ्यांनी केली आहे. या प्रकरणावर तोडगा काढण्यासाठी पालकमंत्री सामंत यांनी उद्या बैठक आयोजित केली आहे. या बैठकीत मोबदल्यावर अंतिम निर्णय होणार आहे.