जुलै अखेर ५ लाख रेशनकार्डधाऱकांची ई-केवाससी पूर्ण

पाच लाख रेशनकार्डधारकांची ई-केवायसी पूर्ण
मुदत संपली; मोबाईल अॅपद्वारे करता येणार पूर्तता
सकाळ वृत्तसेवा
रत्नागिरी, ता. ५ : जिल्ह्यात जुलैअखेर ५ लाखांहून अधिक रेशनकार्डधारकांनी ई-केवायसी पूर्ण केली आहे. आता मशिनद्वारे ई-केवायसी करण्याची मुदत संपली असली तरीही मेरा केवायसी आणि आधार फेस आरडी सर्व्हिस अॅप या द्वारे ई-केवायसी करता येणार आहे. जिल्ह्यातील ६६ जणांनी एकाच दिवशी ई-केवायसी केली आहे. अजूनही २ लाख ७० हजार १०८ कार्डधारकांनी ई-केवायसी केलेली नाही.
जिल्ह्यासह राज्यभरात रेशन दुकानांसाठी ई-केवायसी काम महत्त्वाचे आहे. केवायसी करण्यासाठी ३१ जुलैपर्यंत मुदत होती. त्यामुळे जिल्ह्यात तब्बल ५ लाखांहून अधिक रेशनधारकांनी ई-केवायसी पूर्ण केली आहे तर २० हजारांहून अधिक जणांची ई-केवायसी रद्द करण्यात आली. तर ३ लाख ६६ हजार ७२८ आधार पडताळणी प्रलंबित आहे. शासनाने यापूर्वी देखील ई-केवायसीसाठीची मुदत दिली होती. दोन ते तीनवेळा मुदतवाढ देऊनही कार्डधारकांकडून अपेक्षित प्रतिसाद मिळत नसल्याने जिल्ह्यात मोठ्या प्रमाणात ई-केवायसी अजून प्रलंबित आहे. शासनाने कारवाईला सुरुवात केली नसली तरी ज्याची ही प्रक्रिया अपूर्ण आहे त्या कार्डधारकांचे धान्य बंद होणार आहे. त्यामुळे कार्डधारकांनी लवकरात लवकर मोबाईल अॅपद्वारे ई-केवायसी पूर्ण करावी, असे आवाहन जिल्हा पुरवठा विभागाने केले आहे.

चौकट...
तालुकानिहाय ई-केवायसी प्रलंबित संख्या
तालुका* लाभार्थी
-------------
मंडणगड* ९८९५
दापोली* २९,४१५
खेड* २६,८२७
गुहागर* १०,८५२
चिपळूण* ४१,५९७
संगमेश्वर* ४३,२३५
रत्नागिरी* ५७,३२९
लांजा* १५,६३२
राजापूर* ३५,३२६
---
कोट
रेशनकार्डधारकांनो, ई-केवायसीची मुदत संपली आहे. शासनाच्यावतीने अद्याप मुदतवाढीची तारीख आलेली नाही. तरीही मोबाईल अॅपद्वारे ई-केवायसी होत आहे.
- रोहिणी रजपूत, जिल्हा पुरवठा अधिकारी, रत्नागिरी