बिबट्याचा बंदोबस्त करण्याची मागणी

बिबट्याचा बंदोबस्त
करण्याची मागणी
आरोंदा, ता. ८ ः आरोंदा गावात गेले काही दिवस धुमाकूळ घालणाऱ्या बिबट्याचा बंदोबस्त करावा, अशी मागणी ग्रामस्थांच्या वतीने ग्रामपंचायतीने वनविभागाकडे केली आहे. याबाबत ग्रामपंचायतीने वनविभागाला निवेदन दिले. गेले काही दिवस आरोंदा गावात या जंगली प्राण्यांचा उपद्रव वाढला असून, ग्रामस्थांमध्ये भीतीचे वातावरण पसरले आहे. बिबट्याच्या हल्ल्यात दोन जनावरांचा मृत्यू झाला असून, पाळीव प्राण्यांवर हल्ल्या करण्याचे प्रकार वाढले आहेत. वारंवार घडणाऱ्या या घटनांबाबत वनविभागाने तत्काळ कारवाई करावी, असे निवेदनात नमूद केले आहे. यावेळी वनविभागाचे अधिकारी श्री. शर्मा यांनी आरोंदा उपसरपंच गोविंद उर्फ आबा केरकर व ग्रामपंचायत सदस्य सिद्धेश नाईक यांना संबंधित घटनेबाबत तत्काळ दखल घेऊन उपाययोजना करू, असे आश्वासन दिले.
...................
दिव्यांग तक्रार निवारण
समितीची गुरुवारी सभा
सिंधुदुर्गनगरी, ता. ८ ः ग्रामविकास विभागाकडील शासन निर्णयानुसार दिव्यांग व्यक्तींच्या तक्रारींचे निवारण करण्यासाठी तक्रार निवारण समिती गठित करून दर महिन्याला तक्रार निवारण समितीची सभा घेण्यात येणार आहे. त्याअनुषंगाने जिल्हा परिषदेमार्फत दिव्यांग व्यक्तींच्या तक्रारींचे निराकरण करण्यासाठी गुरुवारी (ता. १४) दुपारी ११ वाजता ऑनलाईन सभा आयोजित केली आहे. ही सभा जिल्हा परिषद मुख्य कार्यकारी अधिकाऱ्यांच्या दालनात व्हिडीओ कॉन्फरन्सद्वारे घेण्यात येणार आहे. जिल्ह्यातील दिव्यांग व्यक्तींनी या सभेसाठी नजीकच्या पंचायत समिती कार्यालयात उपस्थित राहून ऑनलाईन माध्यमातून सहभागी होण्याचे आवाहन उपमुख्य कार्यकारी अधिकारी जयप्रकाश परब यांनी केले आहे.
.....................
वेंगुर्ले ‘आयटीआय’मध्ये
इलेक्ट्रीकल अभ्यासक्रम
सिंधुदुर्गनगरी, ता. ८ : कृषिभूषण आबासाहेब उर्फ रमाकांत मुकुंद कुबल शासकीय औद्योगिक प्रशिक्षण संस्था वेगुर्ले येथे न्यू एज कोर्स अंतर्गत नावीन्यपूर्ण व्यवसाय अभ्यासक्रमांतर्गत ‘सोलर टेक्निशियन’चा (इलेक्ट्रीकल) ४० जागांचा २०२५ प्रवेश सत्रात समावेश केला आहे. या जागांसाठी शैक्षणिक पात्रता दहावी उत्तीर्ण असून कालावधी एक वर्ष आहे. इच्छुक विद्यार्थ्यांनी औद्योगिक प्रशिक्षण संस्थेत संपर्क करण्याचे आवाहन प्राचार्य यांनी केले आहे. अधिक माहितीसाठी संकेतस्थळावर ऑनलाईन अर्ज भरून संस्थेत निश्चित करावे.
---
बांधकाम विभागाची
गुरुवारी मासिक सभा
सिंधुदुर्गनगरी, ता. ८ ः जिल्हा परिषदेच्या बांधकाम विभाग समितीची मासिक सर्वसाधारण सभा गुरुवारी (ता. १४) दुपारी १२ वाजता मुख्य कार्यकारी अधिकारी तथा प्रशासक जिल्हा परिषद सिंधुदुर्ग यांच्या अध्यक्षतेखाली छत्रपती शिवाजी महाराज सभागृह सिंधुदुर्गनगरी येथे आयोजित केल्याची माहिती कार्यकारी अभियंता (बांधकाम) राजेंद्र सावंत यांनी दिली आहे.