वेंगुर्लेची अदिती परब ‘मिस इंडिया २०२५’

83211

वेंगुर्लेची अदिती परब‘मिस इंडिया २०२५’

मुंबईतील स्पर्धेत यश; ‘ग्लॅमरस फेस’ उपविजेतेपदाचाही सन्मान

सकाळ वृत्तसेवा
वेंगुर्ले, ता. ९ ः आयटीसी फॉरच्यून वाशी, नवी मुंबई येथे नुकत्याच झालेल्या दि इंटरनॅशनल ग्लॅमर प्रोजेक्ट मिस इंडिया २०२५ स्पर्धेत वेंगुर्लेची अदिती परब हिने ‘मिस इंडिया २०२५’ हा प्रतिष्ठेचा किताब पटकावला. मूळ वेंगुर्ले तालुक्यातील मठ-परबवाडी येथील रहिवासी व सध्या दहिसर मुंबई स्थित अदिती ही कृष्णा परब व कृतिका परब यांची कन्या तसेच (कै.) चंद्रकांत परब यांची नात आहे. या यशामुळे तिने कुटुंबासोबत संपूर्ण कोकणाचेही नाव उज्वल केले आहे.
अदितीला ‘ग्लॅमरस फेस’ हा उपविजेतेपदाचाही बहुमान मिळाला, जो तिच्या आत्मविश्वासपूर्ण आणि मोहक व्यक्तिमत्त्वाचा सन्मान आहे. अर्थशास्त्रात पदव्युत्तर शिक्षण घेत असलेली अदिती ही एक उत्तम नृत्यांगना आणि होतकरू अभिनेत्री आहे. तिला फ्रेंच भाषेचे ज्ञान अवगत आहे. तिने जे यश प्राप्त केले, त्यामागे तिने घेतलेली मेहनत, सातत्य व नवनवीन येत असलेल्या संकटांचा सामना करत व आई-वडिलांचे स्वप्न, तिची इच्छाशक्ती आणि कुटुंबाचा आधार यामुळेच हे शक्य झाल्याचे तिने सांगितले.
अदितीने दिलेल्या मुलाखतीत म्हटले आहे की, ‘हा मुकुट माझ्या आई-वडिलांसाठी, कुटुंबासाठी आणि प्रत्येक स्वप्न पाहणाऱ्या व्यक्तीसाठी आहे. त्यांच्या डोळ्यांत अभिमानाचे अश्रू पाहणे, हेच माझे खरे यश आहे.’ आता अदिती भारताचे प्रतिनिधित्व आंतरराष्ट्रीय स्तरावर करण्यासाठी संयुक्त राष्ट्रला (यूएसए) जाणार असून, आता वेंगुर्लेच्या या लेकीचा प्रवास आंतरराष्ट्रीय व्यासपीठाकडे सुरू झाला आहे.