विकासाची घोडदौड थांबणार नाही

83215

विकासाची घोडदौड थांबणार नाही

नीलेश राणे ः मालवणात नारळी पौर्णिमेनिमित्त नागरिकांशी संवाद

सकाळ वृत्तसेवा
मालवण, ता. ९ : राज्याच्या अर्थसंकल्प अधिवेशनात अर्थमंत्री अजित पवार यांनी मालवण देवबाग बंधाऱ्यांसाठी १५८ कोटी निधी जाहीर केला. यासोबत अनेक विकास प्रकल्प महायुती सरकारच्या माध्यमातून मंजूर होत आहेत. किनारपट्टीच्या सुरक्षेसाठी तसेच बंधारे उभारणीसाठी सर्वाधिक निधी मंजूर झाला आहे. मालवण-कुडाळच्या जनतेने संधी दिल्यामुळे हे सर्व शक्य होत आहे. आता विकासाची ही गती कायम राहणार आहे. सर्वाधिक निधी आणून किनारपट्टीचा कायापालट करण्यात येईल. मागील दहा वर्षांत या मतदारसंघात काहीच झाले नाही. मात्र, आता शंभरपट निधी आणून सर्व विकासकामे पूर्ण करणार, असे प्रतिपादन आमदार नीलेश राणे यांनी येथे केले.
मालवणच्या ऐतिहासिक नारळी पौर्णिमा उत्सवानिमित्त आमदार राणे यांनी व्यापारी बांधवांच्या मानाच्या श्रीफळाचे तसेच सागराचे पूजन करत श्रीफळ अर्पण केले. मच्छीमार, व्यापारी, नागरिक यांची भरभराट होउदे, असेही साकडे यावेळी घालण्यात आले. बंदर जेटी येथे आयोजित भाजप महिला नारळ लढवणे स्पर्धा, सतीश आचरेकर मित्रमंडळ खुली नारळ लढवणे स्पर्धा, शिल्पा यतीन खोत मित्रमंडळ आयोजित राज्यस्तरीय महिला नारळ लढवणे स्पर्धा, मालवणी संस्कृती व वारसा मंडळ अध्यक्ष अरविंद मोंडकर आयोजित महिला नारळ लढवणे स्पर्धा, लायन्स क्लब आयोजित कबड्डी स्पर्धा आदी स्पर्धांचे उद्‍घाटन आमदार राणे यांच्या हस्ते झाले.
यावेळी शिवसेना उपनेते संजय आंग्रे, शिवसेना जिल्हाप्रमुख दत्ता सामंत, जिल्हा संघटक महेश कांदळगावकर, भाजप जिल्हाध्यक्ष प्रभाकर सावंत, जिल्हा उपाध्यक्ष अशोक सावंत, तालुकाध्यक्ष धोंडी चिंदरकर, बाबा मोंडकर, महिला तालुकाध्यक्ष माधुरी मसुरकर, शहराध्यक्षा अन्वेषा आचरेकर, शिवसेना तालुकाप्रमुख विनायक बाईत, शहरप्रमुख दीपक पाटकर, सुदेश आचरेकर, आबा हडकर, महेश मांजरेकर, दादा साईल, विश्वास गावकर, बबन शिंदे, राजा गावकर, किसन मांजरेकर, संग्राम साळसकर, निषय पालेकर, अभी लाड, सोनाली पाटकर, अंजना सामंत, बाळू नाटेकर, मधुरा तुळसकर, अरुण तोडणकर, राजू बिडये आदी उपस्थित होते.
---
‘पुढील पाच वर्षांत रेकॉर्डब्रेक निधी’
मालवण-कुडाळमध्ये नगरोत्थान निधी आगामी काळात सर्वाधिक स्वरुपात आणणार. यापूर्वी किरकोळ स्वरुपात आलेला निधी पुढील पाच वर्षांत रेकॉर्डब्रेक स्वरुपात येईल, असा विश्वास आमदार राणे यांनी व्यक्त केला. महायुती सरकारच्या माध्यमातून मोठा निधी उपलब्ध होत असल्याचे सांगत त्यांनी आभार मानले.