आर.के. नारायण व डॉ. सी.व्ही. रमण गट प्रथम

नारायण, डॉ. रमण गट प्रथम
रानभाज्या स्पर्धा ; नाणीज विद्यामंदिरमध्ये आयोजन
सकाळ वृत्तसेवा
रत्नागिरी, ता. १० ः तालुक्यातील नाणीज माध्यमिक विद्यामंदिरामध्ये गणित-विज्ञान समितीमार्फत आयोजित रानभाज्या प्रदर्शन स्पर्धेत लहान गटात आर.के. नारायण (ग्रीन हाऊस) तर मोठ्या गटात डॉ. सी.व्ही. रमण (ब्लू हाऊस) यांनी प्रथम क्रमांक पटकावला.
विद्यार्थ्यांना रानभाज्यांचे महत्त्व, त्यांचे औषधी गुणधर्म आणि त्यांची ओळख करून देण्याचा प्रमुख उद्देश होता. या कार्यक्रमाला संस्थेचे सचिव श्री. कांबळे, संस्थेचे सीईओ श्री. दरडी, शाळा व्यवस्थापन समितीचे सदस्य, शाळा सुरक्षा समिती आणि शिक्षक-पालक संघाचे पदाधिकारी उपस्थित होते. २०२५-२६ या वर्षासाठी आयोजित या स्पर्धेत चार हाऊस सहभागी झाले होते. त्यात कवी कुसुमाग्रज (रेड हाऊस), आर.के. नारायण (ग्रीन हाऊस), डॉ. सी.व्ही. रमण (ब्लू हाऊस), विश्वनाथन आनंद (येलो हाऊस) यांचा समावेश होता. यावेळी झालेल्या स्पर्धेत इयत्ता ५ वी ते ७ वी तील विद्यार्थ्यांचा लहान गट आणि इयत्ता ८वी ते १० वीतील विद्यार्थ्यांचा मोठा गट करण्यात आला होता. प्रत्येक हाऊसमधील दोन विद्यार्थ्यांना रानभाज्या प्रदर्शन स्पर्धेत घेण्यात आले होते. या विद्यार्थ्यांनी टाकळा, ओरडू, भारंगी, कुरडू, कुड्याच्या शेंगा, शेवग्याच्या शेंगांचा पाला, फोडशी, सुरण यासारख्या दुर्मिळ रानभाज्या प्रदर्शनात मांडल्या होत्या. याप्रसंगी प्रत्येक भाजीचे नाव सांगून, तिचे वैज्ञानिक आणि औषधी गुणधर्मही त्यांनी उपस्थितांना समजावून सांगितले. या स्पर्धेचे परीक्षण कॉलेजचे प्राध्यापक श्री. फुटक आणि श्री. मुळे यांनी केले. या स्पर्धेमध्ये लहान गटात आर.के. नारायण (ग्रीन हाऊस, प्रथम), कवी कुसुमाग्रज (रेड हाऊस, द्वितीय) तर मोठा गट डॉ. सी.व्ही. रमण (ब्लू हाऊस, प्रथम), विश्वनाथन आनंद (यलो हाऊस, द्वितीय) यांनी यश मिळवले.