जामसंडे पीएम श्री शाळेत ''श्रावण सोहळा'' उत्साहात

83442

जामसंडे पीएम श्री शाळेत
‘श्रावण सोहळा’ उत्साहात
सकाळ वृत्तसेवा
देवगड, ता. ११ ः श्रावणाचे महत्त्व विद्यार्थ्यांना समजावे आणि या महिन्याचे धार्मिक महत्त्व लक्षात घेऊन जामसंडे येथील पीएम श्री आदर्श शाळेमध्ये श्रावण सोहळा शैक्षणिक सप्ताह उत्साहात साजरा झाला. विद्यार्थ्यांच्या कलागुणांना संधी मिळावी, त्यांच्यातील सुप्त गुण बाहेर यावेत, यासाठी उपक्रम घेण्यात आला.
यानिमित्ताने सात दिवस विविध उपक्रम घेण्यात आले. प्रत्येक विद्यार्थ्यामध्ये एक कलाकार दडलेला असतो. त्याला आपली कला आणि कौशल्ये सादर करता यावीत, यासाठी शैक्षणिक उपक्रम सप्ताह साजरा करण्यात आला. यामध्ये विद्यार्थी काव्य गायन व नृत्य गायन स्पर्धा, कथाकथन स्पर्धा व नाट्य अभिनय स्पर्धा, ‘लोकमान्य टिळक एक झुंझार नेते’ यावर वक्तृत्व स्पर्धा, रंगभरण व चित्रकला स्पर्धा, ‘माझा आवडता सण’ या विषयावर निबंध स्पर्धा, प्रश्नमंजुषा स्पर्धा आणि कार्यानुभव कला कौशल्य स्पर्धा असे विविध उपक्रम प्रत्येक दिवशी एक याप्रमाणे घेण्यात आले. शेवटच्या दिवशी विद्यार्थी सन्मान सोहळा आयोजित करण्यात आला. यावेळी सर्व स्पर्धा प्रकारांत प्रथम आलेल्या विद्यार्थ्यांचा सन्मानचिन्ह देऊन गौरव करण्यात आला. सुदाम जोशी, राजश्री मोंडकर, मुख्याध्यापिका सुमेधा तेली यांनी मार्गदर्शन केले. निकिता परब, रघुनाथ बोडेकर, राजेंद्र कांबळे, दिनेश दळवी, सुधा घाडी, क्रांती सारंग उपस्थित होते.