''महाभारताचे अंतरंग'' लहान-थोरांसाठी प्रेरक

83662

‘महाभारताचे अंतरंग’ लहान-थोरांसाठी प्रेरक
वैद्य सुविनय दामलेः कुडाळ येथे पुस्तक प्रकाशन सोहळा
सकाळ वृत्तसेवा
कुडाळ, ता. ११ः वेदांतने एवढ्या लहान वयात महाभारतावर केलेले भाष्य हे कौतुकास्पद आहे. लहान मुलांआधी मोठ्यांनी हे पुस्तक वाचणे गरजेचे आहे. अनेक भाषांमध्ये हे पुस्तक यावे आणि ‘महाभारत’ सर्वदूर पोहोचावे, असे गौरवोद्गार वेदांत पंडित याच्या ‘महाभारताचे अंतरंग’ या पुस्तकाच्या प्रकाशनप्रसंगी वैद्य सुविनय दामले यांनी येथे काढले.
वयाच्या अवघ्या बाराव्या वर्षी महाभारताचा अभ्यास करून त्यावर पुस्तक लिहिणाऱ्या येथील १५ वर्षीय वेदांत पंडित याच्या ‘महाभारताचे अंतरंग’ या पुस्तकाचे प्रकाशन रविवारी सायंकाळी वैद्य परीक्षित शेवडे यांच्या हस्ते झाले. वैद्य दामले यांनी या पुस्तकाची प्रस्तावना लिहिली आहे.
आरती प्रभू कला अकादमी सभागृहात आयोजित केलेल्या या प्रकाशन सोहळ्याला वैद्यराज परीक्षित शेवडे, श्री. दामले, लेखक वेदांत पंडित हे व्यासपीठावर उपस्थित होते. कार्यक्रमाचा आरंभ मान्यवरांच्या हस्ते योगेश्वर श्रीकृष्ण, भारतमाता आणि छत्रपती शिवाजी महाराज यांच्या प्रतिमेचे पूजन करून झाले. यावेळी उपस्थित पाहुण्यांचा शाल, श्रीफळ देऊन सत्कार करण्यात आला. सौ. पंडित आणि सौ. देसाई यांनी मान्यवरांचे औक्षण करून रक्षाबंधन केले.
सहावीत असताना वेदांत याने कुतुहलापोटी महाभारतावरची पुस्तके वाचली. त्यावर सुरुवातीला इंग्रजीतून व नंतर मराठीत लेखन केले. आज तो दहावीत आहे, पण त्याने केलेले वैचारिक काम खूप मोठे आहे, असे श्री. दामले यांनी सांगितले. निवृत्त मुख्याध्यापक बी. बी. शिरसाट यांनी मुद्रित शोधन केले आहे, तर रवळनाथ प्रकाशनने हे पुस्तक प्रकाशित केले आहे.     
आपल्या मनोगतातून लेखक वेदांत पंडित याने हे पुस्तक लेखनामागची आपली भूमिका स्पष्ट केली. महाभारत का झाले, याची त्याने कारणे देखील सांगितली. श्री. शेवडे यांनी वेदांतचे कौतुक करून त्याला शुभेच्छा दिल्या. उत्तरोत्तर लिहीत राहा, असा सल्लाही त्यांनी दिला. त्यांनतर त्यांनी महाभारतावर विवेचन केले. स्वागत विवेक पंडित आणि कुटुंबीयांनी केले. सूत्रसंचालन विवेक मुतालिक यांनी, तर आभार विवेक पंडित यांनी मानले. यावेळी मिलिंद देसाई, बी. बी. शिरसाट, प्रसाद शिरसाट, अरविंद शिरसाट, अजित फाटक आदी उपस्थित होते.