चिपळूण-पाग पॉवरहाऊस क्रॉसिंगजवळ अखेर विजेची सुविधा

83693

पाग पॉवरहाऊस क्रॉसिंगजवळ
अखेर विद्युत दिव्यांची सुविधा

चिपळूण, ता. ११ः मुंबई–गोवा राष्ट्रीय महामार्गावरील पाग पॉवरहाऊस क्रॉसिंग येथे अंधारामुळे अपघाताचा धोका वाढला होता. स्थानिक नागरिकांच्या सततच्या तक्रारी आणि पाठपुराव्यानंतर अखेर येथे विद्युत दिव्यांची व्यवस्था करण्यात आली आहे.
पाग भागातील रहिवाशांना महामार्ग ओलांडताना रात्रीच्या अंधारात मोठी अडचण येत होती. त्यामुळे अपघातांची शक्यता वाढली होती. या समस्येकडे लक्ष वेधून सामाजिक कार्यकर्ते सुयोग चव्हाण यांनी राष्ट्रीय महामार्ग प्राधिकरणाच्या अधिकाऱ्यांशी वारंवार चर्चा केली. त्यांच्या प्रयत्नांना यश मिळताच क्रॉसिंगवरील अंधार दूर करण्यासाठी दिवे बसवण्यात आले. यामुळे वाहनचालक आणि पादचाऱ्यांना मोठा दिलासा मिळाला असून, नागरिकांनी या कामाचे कौतुक केले आहे; मात्र, अजूनही काही भाग अंधारात असल्याने संपूर्ण सुरक्षितता सुनिश्चित झालेली नाही. वाहतूक व्यवस्थापन, सुरक्षा आणि स्थानिकांच्या मूलभूत गरजांसाठी पुढाकार घेण्याची आवश्यकता आहे. त्यामुळे या ठिकाणी आणखी एक हायमास्ट दिवा बसवण्याच्यादृष्टीने चव्हाण यांचे प्रयत्न सुरू आहेत. यासाठी ते संबंधित अधिकाऱ्यांशी चर्चा करणार असून, यालाही सकारात्मक प्रतिसाद मिळेल, अशी अपेक्षा त्यांनी व्यक्त केली.