दापोली अर्बनमधील ठेवीदारांना अपघाती विमा संरक्षण

दापोली अर्बनच्या ठेवीदारांना अपघाती विमा
जयवंत जालगावकर ः ९ टक्के लाभांश जाहीर
सकाळ वृत्तसेवा
दापोली, ता. ११ ः दापोली अर्बन बँकेला ३ कोटी ९२ हजारांचा निव्वळ नफा २०२४-२५ या आर्थिक वर्षात झाला आहे. या प्रसंगी सभासदांना ९ टक्के लाभांश देण्याचे जाहीर करण्यात आल्याची माहिती अध्यक्ष जयवंत जालगावकर यांनी दिली.
दापोली अर्बन बँकेची सर्वसाधारण सभा नवभारत छात्रालयाच्या सभागृहात झाली. बँकेत ५० हजारापेक्षा अधिक रक्कम ठेवणाऱ्या सर्व ठेवीदारांना बँकेने पाच लाखांचे अपघाती विमा संरक्षण दिले आहे. सभासदांना बँकेकडून दोन लाख रुपयांचा अपघाती विमा संरक्षण आणि सभासदांच्या ठेवींना डीआयसीजीसीचे पाच लाखांचे विमा संरक्षण देण्यात आल्याची माहिती अध्यक्ष डॉ. जालगावकर यांनी दिली.
राष्ट्रीय आणि राज्यपातळीवर विशेष नावलौकिक पटकावणाऱ्या सदस्यांचा विशेष सन्मान करण्यात आला. यामध्ये कोलंबो विद्यापीठाची मानद डॉक्टरेट मिळाल्याबद्दल डॉ. प्रशांत परांजपे, देशपातळीवरील नवरत्न पुरस्कार मिळाल्याबद्दल मिलिंद सैतवडेकर, प्रो गोविंदामध्ये राज्यस्तरावर नावलौकिक मिळवल्याबद्दल हिंदुराज गोविंदा पथक जालगाव, जिल्हा परिषद शाळा वाकवली, कबड्डी क्षेत्रातील उत्तुंग व्यक्तिमत्त्व हा राष्ट्रीय पुरस्कारप्राप्त मंगेश मोरे, डॉ. विकास शेट्ये, आंतरराष्ट्रीय पर्यटन गावचा दर्जा मिळाल्याबद्दल कर्देचे सरपंच आणि सदस्य, राष्ट्रीय कबड्डी स्पर्धेसाठी निवड झाल्याबद्दल श्रेयस लाले यांचा विशेष सन्मान करण्यात आला.