निष्ठूर प्रशासन; अधिकारी फिरकलेच नाहीत

83760

निष्ठूर प्रशासन; अधिकारी फिरकलेच नाहीत

सोनकुसरे कुटुंब ः आठव्या दिवशीही उपोषण सुरूच

सकाळ वृत्तसेवा
सिंधुदुर्गनगरी, ता. ११ ः वैयक्तिक मान्यता प्राप्त स्थायी कर्मचारी म्हणून नियुक्ती आदेश आणि जानेवारीपासून गेल्या सहा महिन्यांचे थकित राहिलेले वेतन मिळावे, या मागणीसाठी जामसंडे येथील प्रमोद सोनकुसरे यांचे आपल्या कुटुंबासमवेत सोमवारपासून (ता. ४) जिल्हा परिषदेसमोर सुरू केलेले आमरण उपोषण प्रशासनाकडून दखल न घेतल्याने अद्यापही सुरू आहे.
सोनकुसरे यांनी दिलेल्या माहितीनुसार, माध्यमिक शिक्षणाधिकाऱ्यांच्या २ जानेवारीच्या लेखी आदेशानुसारच ३ जानेवारीला केळकर हायस्कूल वाडा (ता. देवगड) येथे लिपिक या पदावर नियमितपणे सेवेत हजर झालो; मात्र शासन निर्णयातील तरतुदीनुसार आजपर्यंत त्यांच्याकडून मला विहित नमुन्यातील स्वतंत्र नियुक्ती आदेश मिळालेला नाही. त्यामुळे जानेवारी ते २०२५ या कालावधीचे वेतन अद्याप मिळालेले नाही. यामुळे मोठी आर्थिक अडचण निर्माण झाली असून, उपोषणाचा मार्ग धरावा लागला आहे, असे त्यांनी सांगितले. गेले आठ दिवस उपोषण सुरू असून त्यांची पत्नी व मुलगा यामध्ये सहभागी झाले आहेत. याबाबत माध्यमिक शिक्षणाधिकारी यांच्याशी संपर्क साधण्याचा प्रयत्न केला असता ते सुटीवर गेल्याचे समजले.
----
उपोषणकर्त्यांची प्रकृती खालावली
सोनकुसरे यांनी नियुक्ती आदेश मिळावा तसेच जानेवारीपासूनचे थकित वेतन मिळावे, यासाठी जिल्हा परिषद प्रवेशद्वारावर आमरण उपोषण सुरू केले आहे. या उपोषणाचा आजचा आठवा दिवस असून, उपोषणकर्त्यांची तब्येत कमालीची खालावली आहे. रोज आरोग्य पथकामार्फत तपासणी करून त्याचा अहवाल प्रशासनाला सादर करण्यात येतो, तरीही माध्यमिक शिक्षणाधिकारी यांनी अद्याप दखल घेतलेली नाही, सोनकुसरे यांचे म्हणणे आहे.