मोर्ले ग्रामपंचायतीच्या कारभाराची चौकशी करा

मोर्ले ग्रामपंचायतीच्या
कारभाराची चौकशी करा

गोपाळ गवस यांचे प्रशासनास निवेदन

सकाळ वृत्तसेवा
दोडामार्ग, ता. ११ : तालुक्यातील मोर्ले ग्रामपंचायत कारभाराची चौकशी करून कर्तव्यात कसूर करणाऱ्या सरपंच, ग्रामसेवकांना बडतर्फ करावे; अन्यथा १५ ऑगस्टला आपल्या कार्यालयासमोर उपोषणास बसणार असल्याचे लेखी निवेदन शिवसेना संघटक गोपाळ गवस यांनी गटविकास अधिकारी यांना दिले.
निवेदनात म्हटले आहे की, यापूर्वीही मोर्ले ग्रामपंचायत दप्तर तपासणीची मागणी केली होती. मात्र, या मागणीकडे दुर्लक्ष करत प्रशासनाने तपासणी केली नाही. मुख्य कार्यकारी अधिकाऱ्यांकडे कारवाईची मागणी केली. मात्र, त्याकडे दुर्लक्ष करण्यात आले. मोर्ले ग्रामपंचायतीचा सरपंच व ग्रामसेवक यांच्याकडून कारभार रामभरोसे असा चालला असून यामुळे गावाचे नुकसान होत आहे. वेळोवेळी मागणी करून सुद्धा कोणतीही चौकशी करण्यात आली नसल्याने प्रशासन त्यांना पाठीशी घालत आहे का, असा प्रश्न उपस्थित केला आहे. सरपंच ज्या पद्धतीने कारभार करीत आहेत, हे ग्रामपंचायत दप्तरची तपासणी केल्यावर दिसून येईल. सरपंच एका खासगी आयुर्वेदिक हॉस्पिटलमध्ये कामाला असून, त्यामुळे ते पूर्णवेळ गावाच्या विकासासाठी देऊ शकत नाहीत, असे गवस यांनी म्हटले आहे.