चंद्रजित यादव यांना श्रद्धांजली

- rat१२p१.jpg -
२५N८३८४७
चंद्रजित यादव
----
सह्याद्री स्कूल ऑफ आर्टतर्फे
चंद्रजित यादव यांना श्रद्धांजली
सकाळ वृत्तसेवा
संगमेश्वर, ता. १२ ः शिल्पकला क्षेत्रातील एक तेजस्वी तारा आपल्यातून कायमचा निघून गेला आहे. भारतातील ज्येष्ठ चित्रकार व सुप्रसिद्ध शिल्पकार चंद्रजित यादव यांचे दीर्घ आजाराने निधन झाले असून, कलाक्षेत्रात पोकळी निर्माण झाली आहे, अशा शब्दात सावर्डे येथील सह्याद्री कला महाविद्यालयातील प्राध्यापक व विद्यार्थ्यांनी श्रद्धांजली वाहिली.
यादव हे देश-विदेशातील सार्वजनिक ठिकाणे आणि कलादालनं आपल्या अप्रतिम शिल्पकलेने समृद्ध करणारे एक दिग्गज कलाकार होते. त्यांनी कास्य, मार्बल, रिलिफ इत्यादी माध्यमांतून अनेक भव्य शिल्पांची निर्मिती केली. रायगड किल्ल्यावर उभारलेले राजमाता जिजाऊ भोसले यांचे भव्य कास्यशिल्प हे त्यांचे एक अतुलनीय कार्य आहे तसेच नामांकित नेते, समाजसुधारक, ऐतिहासिक व्यक्तिमत्त्वे यांच्या मूर्ती, स्मारके आणि सार्वजनिक ठिकाणावरील कलाकृतींमधून त्यांनी आपल्या कलात्मक प्रतिभेचे दर्शन घडवले. त्यांनी कोल्हापूर, सांगली, पुणे आणि मुंबई येथील प्रतिष्ठित कला संस्थांमधून चित्रकला व शिल्पकला या शाखांमध्ये उच्च शिक्षण घेतले. त्यांच्या कला प्रवासात महाराष्ट्र राज्यातील कला स्पर्धांमध्ये त्यांनी अनेक राज्यस्तरीय पुरस्कार मिळवले. सह्याद्री स्कूल ऑफ आर्ट या चित्र शिल्पकला महाविद्यालयाशी त्यांचा जिव्हाळ्याचा ऋणानुबंध होता. त्यांच्या भेटीदरम्यान त्यांनी विद्यार्थ्यांसाठी आणि प्राध्यापकांसाठी अनेकवेळा प्रात्यक्षिके दिली. सह्याद्री शिक्षणसंस्थेचे संस्थापक स्व. गोविंदरावजी निकम यांचे ब्राँझमधील शिल्प सावर्डे वहाळफाटा येथील समाधीजवळील स्मृतिगंध या म्युझियममध्ये त्यांनी तयार केले तसेच खरवते येथील कृषी महाविद्यालयात त्यांनी पूर्णाकृती शिल्पाची निर्मिती केली. प्रा. प्रकाश राजेशिर्के यांचे पोर्ट्रेटसुद्धा अत्यंत उत्कृष्टतेने साकारले. सह्याद्री स्कूल ऑफ आर्ट परिवारातर्फे या महान कलाकाराला भावपूर्ण श्रद्धांजली वाहण्यात आली.