मराठी राज्य नाट्य स्पर्धेची प्राथमिक फेरी वेंगुर्लेत व्हावी

83918

मराठी राज्य नाट्य स्पर्धेची
प्राथमिक फेरी वेंगुर्लेत व्हावी

वालावलकर ः सांस्कृतिक कार्य संचालकांना निवेदन

सकाळ वृत्तसेवा
वेंगुर्ले, ता. १२ ः ‘महाराष्ट्र राज्यामधील सर्वांत जुनी म्हणून गणली जाणारी वेंगुर्ले नगरपरिषद यावर्षी शतकोत्तर सुवर्ण महोत्सव साजरा करत आहे. यानिमित्ताने राज्याच्या सांस्कृतिक कार्य संचालनालयाच्यावतीने घेण्यात येणाऱ्या हौशी मराठी नाट्य स्पर्धेची प्राथमिक फेरीतील सर्व नाटके येथील मधुसूदन कालेलकर नाट्यगृहात आयोजित करावीत,’ अशी मागणी ‘माझा वेंगुर्ला’तर्फे सामाजिक कार्यकर्ते सचिन वालावलकर यांनी मुंबई येथे संचालक विभीषण चौरे यांची भेट घेऊन केली.
‘वेंगुर्ले शहर मुळातच कलासक्त असून वि. स. खांडेकर, मंगेश पाडगावकर, आरती प्रभू, मधुसूदन कालेलकर यांसारख्या थोर साहित्यकांची परंपरा वेंगुर्लेला लाभली आहे. गेली दोन वर्षे महाराष्ट्र राज्य हौशी मराठी नाट्य स्पर्धेची प्राथमिक फेरी वेंगुर्लेत मोठ्या उत्साहात साजरी झाली. तथापि, सांस्कृतिक कार्य संचालनालयाने गतवर्षी या स्पर्धेसाठी सिंधुदुर्ग हे स्वतंत्र केंद्र घोषित केले. त्यामुळे यावर्षी नाट्यरसिक व नाट्य निर्मिती करणाऱ्या संस्थांमध्ये कमालीचा उत्साह दिसून येत आहे. ब्रिटिशांनी वेंगुर्लेत २५ मे १८७६ ला स्थापन केलेल्या पालिकेला यावर्षी दीडशे वर्षे पूर्ण होत आहेत. हा मोठा योग असून संचालनालयाने यावर्षीची ६४ वी महाराष्ट्र राज्य हौशी मराठी नाट्य स्पर्धेची प्राथमिक फेरी संपूर्णपणे वेंगुर्लेत आयोजित करावी,’ अशी मागणी वालावलकर यांनी केली आहे. याबाबतचे निवेदन त्यांनी मंत्रालय मुंबई येथे सांस्कृतिक कार्य संचालनालयाचे संचालक श्री. चौरे यांची भेट घेऊन दिले. या स्पर्धेच्या प्राथमिक फेरीसाठी समन्वयक म्हणून माजी नगरसेवक प्रशांत आपटे यांची नेमणूक करावी, अशी मागणीही त्यांनी केली. यावर श्री. चौरे यांनी या मागणीबाबत सकारात्मक निर्णय घेण्यात येईल, असे आश्वासन वालावलकर यांना दिले.