‘बुद्धिबळा’त बाळकृष्ण पेडणेकर विजेता

83922

‘बुद्धिबळा’त बाळकृष्ण पेडणेकर विजेता

बांद्यातील स्पर्धा; रोटरी क्लब, रोटरॅक्टच्या स्पर्धेस प्रतिसाद

सकाळ वृत्तसेवा
सावंतवाडी, ता. १२ ः रोटरॅक्ट रायझिंग यूथ आणि रोटरी क्लब ऑफ बांदा यांच्या संयुक्त विद्यमाने बांदा येथे भव्य खुल्या बुद्धिबळ स्पर्धेचे आयोजन करण्यात आले. सिंधुदुर्ग जिल्ह्याचा प्रथम क्रमांकाचा आंतरराष्ट्रीय मानांकित खेळाडू बाळकृष्ण पेडणेकर या स्पर्धेचा विजेता ठरला.
स्पर्धेचे उद्‍घाटन उपसरपंच राजाराम ऊर्फ आबा धारगळकर, रोटरी अध्यक्ष शिवानंद भिडे, सचिव स्वप्नील धामापूरकर, रोटरॅक्ट अध्यक्ष रोहन कुबडे, सचिव डॉ. मिताली सावंत, मुख्याध्यापक श्री. असनकर, रोटरी सदस्य यशवंत आळवे, संकेत वेंगुर्लेकर, विराज परब, रोटरॅक्ट सदस्य मनीषा खणगावकर, शिवम गावडे, नेहा निगुडकर आदींच्या उपस्थितीत करण्यात आले.
स्पर्धा जिल्हा परिषद शाळा क्र.१ च्या सभागृहात घेण्यात आली. सोळा वर्षांवरील आणि खालील अशा दोन गटांत स्पर्धा खेळविण्यात आली. बाळकृष्ण याने पाचही फेऱ्या जिंकून १६ वर्षांवरील खुल्या बुद्धिबळ स्पर्धेचे विजेतेपद पटकावले. त्याला रोख रक्कम, चषक आणि प्रशस्तीपत्र देऊन गौरविण्यात आले. जिल्ह्यातील अठ्ठावीस खेळाडूंनी स्पर्धेत सहभाग घेतला. बाळकृष्ण हा सावंतवाडीतील मुक्ताई ॲकॅडमीचे अध्यक्ष कौस्तुभ पेडणेकर यांचा मुलगा आहे. रोटरी क्लब आणि रोटरॅक्टच्या माध्यमातून बुद्धिबळ खेळाडूंना एक व्यासपीठ उपलब्ध करून दिल्याबददल कौस्तुभ पेडणेकर यांनी समाधान व्यक्त केले.