-महामार्गावरील गलथान कारभाराविरोधात उपोषण सुरू

-rat१२p२.jpg -
२५N८३८४८
संगमेश्वर ः सोनवी चौकात उपोषणाला बसलेले राहुल गुरव.
------
अपूर्ण कामांविरोधात गुरव यांचे उपोषण
महामार्गाबाबत सोनवी चौकात आंदोलन ; जनतेच्या सुरक्षिततेशी खेळ
सकाळ वृत्तसेवा
संगमेश्वर, ता. १२ ः मुंबई-गोवा महामार्गावरील सुरू असलेल्या कामांतील गंभीर त्रुटींविरोधात संगमेश्वर सोनवी चौक येथे सामाजिक कार्यकर्ते राहुल गुरव यांनी बेमुदत उपोषण सुरू केले आहे. महामार्गावर जागोजागी खड्डे, नुकत्याच पूर्ण झालेल्या काँक्रिट रस्त्यांना पडलेले तडे, अपूर्ण आणि असुरक्षित संरक्षक भिंती तसेच शाळकरी मुलांसाठी उभारण्यात आलेल्या निवारा शेड्सची झालेली दुरवस्था या सर्व मुद्द्यांकडे संबंधित प्रशासनाने वारंवार सूचना दिल्यानंतरही दुर्लक्ष केल्यामुळे त्यांनी हे संविधानिक आंदोलन सुरू केले आहे.
गुरव यांनी आपल्या उपोषणाच्या माध्यमातून प्रशासनाच्या गलथान कारभाराची पोलखोल केली असून, कामे सुरू करण्याआधी नियोजनाचा अभाव व नंतर देखरेखीतील निष्काळजीपणा यामुळे स्थानिक जनतेच्या सुरक्षिततेशी खेळ चालला आहे, असे त्यांनी सांगितले. स्थानिक जनतादेखील मोठ्या प्रमाणावर या आंदोलनास पाठिंबा देत आहे.
राजेंद्र पोमेडकर तसेच पक्षाचे इतर पदाधिकारी यांनी उपोषणस्थळी येऊन गुरव यांची भेट घेतली आणि त्यांच्या मागण्यांना पाठिंबा दर्शवला. गुरव यांनी सांगितले, जोपर्यंत प्रशासन गांभीर्याने पावले उचलत नाही तोपर्यंत हे बेमुदत उपोषण सुरूच राहणार आहे.