महावितरण विरोधात शुक्रवारी वीज ग्राहक संघटनेचे उपोषण

महावितरण विरोधात शुक्रवारी
वीज ग्राहक संघटनेचे उपोषण
सावंतवाडी, ता. १२ ः महावितरणचा अनागोंदी कारभार, वाढीव वीज बिले, स्मार्ट प्रीपेड मीटर सक्ती, वारंवार वसूल केली जाणारी अवाजवी सुरक्षा ठेव, अनामत रक्कम आदींच्या विरोधात आवाज उठवण्यासाठी सिंधुदुर्ग जिल्हा वीज ग्राहक संघटनेतर्फे स्वातंत्र्यदिनी शुक्रवारी (ता. १५) एक दिवसीय लाक्षणिक उपोषण जिल्हाधिकारी कार्यालय ओरोस येथे करण्यात येणार आहे.
वीज ग्राहक संघटनेतर्फे महावितरणच्या कारभाराविरोधात अनेकदा निवेदने दिली. उपोषण, आंदोलने करून देखील महावितरणचे अधिकारी त्याला दाद देत नसल्याने वीज ग्राहक संघटना व महावितरणच्या अधिकाऱ्यांची संयुक्त बैठक जिल्हाधिकारी कार्यालय येथे घेण्यासाठी जिल्हाधिकाऱ्यांना निवेदन दिले होते. जिल्हाधिकाऱ्यांनी त्याची दखल न घेतल्यास १५ ऑगस्टला उपोषण केले जाईल, असा इशारा निवेदनात दिला होता. योग्य तोडगा न काढल्याने जिल्हाधिकारी कार्यालय येथे उपोषण करणे भाग पडले आहे. या उपोषणासाठी जिल्ह्यातील वीज ग्राहक संघटना पदाधिकारी, सर्व तालुका संघटना पदाधिकारी, सदस्यांसह जिल्ह्यातील वीज ग्राहकांनी मोठ्या प्रमाणावर सहभागी व्हावे, असे आवाहन सिंधुदुर्ग वीज ग्राहक संघटनेचे अध्यक्ष संजय लाड, जिल्हा समन्वयक अॅड. नंदन वेंगुर्लेकर यांनी केले आहे.