२४४६ शाळांना मिळणार मोफत डिजिटल शिक्षण

डिजिटल शिक्षण २४४६ शाळांमध्ये
शिक्षणाची समान संधी ; शासन-खान अॅकॅडमीचा करार
सकाळ वृत्तसेवा
रत्नागिरी, ता. १२ : सर्वच मुलांना शिक्षणाची समान संधी मिळण्यासाठी खान अॅकॅडमी इंडिया आणि महाराष्ट्र सरकार एकत्र आले आहे. राज्यातल्या सरकारी शाळांमधील मुलांना त्यांच्या अभ्यासक्रमावर आधारित दर्जेदार डिजिटल शैक्षणिक साहित्य मोफत मिळणार आहे. यासाठी ५ वर्षांचा करार झाला आहे. जिल्ह्यातील २४४६ शाळांना याचा लाभ मिळणार आहे.
मुख्यमंत्री देवेंद्र फडणवीस, शिक्षणमंत्री दादा भुसे आणि राज्यमंत्री पंकज भोयर यांच्या उपस्थितीत नुकताच करार करण्यात आला. डॉ. जयंत नारळीकर गणित आणि विज्ञान अध्ययन समृद्धी कार्यक्रमांतर्गत, खान अॅकॅडमीचे डिजिटल साहित्य राज्यातल्या ६२ हजारपेक्षा जास्त सरकारी शाळांमध्ये वापरले जाईल. गणित आणि विज्ञानाचे साहित्य मराठी आणि इंग्रजी भाषेत आयुष्यभर विनामूल्य उपलब्ध होईल.
खान अॅकॅडमी इंडियाच्या व्यवस्थापकीय संचालक स्वाती वासुदेवन यांना सांगितले की, महाराष्ट्रामध्ये ४८८ शाळांपासून सुरुवात केली. आता राज्यात पोहोचणार आहोत. प्रत्येक मुलाला जगातलं सर्वोत्तम शिक्षण मिळाले पाहिजे. हे शैक्षणिक साहित्य विद्यार्थ्यांच्या स्वअध्ययनासाठी आणि शिक्षकांना वर्गात शिकवण्यासाठी अशा दोन्ही प्रकारे उपयुक्त ठरेल.