शिडवणेत व्यसनमुक्तीचा संदेश

84185

शिडवणेत व्यसनमुक्तीचा संदेश
तळेरे : रक्षाबंधन सणानिमित्त शिडवणे क्र. १ शाळेच्या कल्पना चावला गाईड पथकाने अनोखा उपक्रम राबविला. विद्यार्थिनींनी शिडवणे गावातील दुकानांना भेटी देऊन सर्वांना राख्या बांधल्या आणि व्यसनमुक्तीचा संदेश दिला. शाळेतील रक्षाबंधन कार्यक्रम झाल्यानंतर गाईड पथकाने परिसरातील विविध दुकानांमध्ये जाऊन दुकानदारांना राख्या बांधल्या. यावेळी १८ वर्षांखालील मुलांना तंबाखूजन्य पदार्थ विकू नका, अशा भावना त्यांनी व्यक्त केल्या. दुकानदारांनी मुलींना खाऊ देत व्यसनमुक्तीसाठी प्रयत्न करण्याचे आश्वासन दिले. या उपक्रमाबद्दल दुकानदारांनी विद्यार्थिनींचे आणि शाळेचे कौतुक केले. यावेळी शाळा व्यवस्थापन समितीचे शिक्षणतज्ज्ञ मनोहर कोकाटे, शाळेचे मुख्याध्यापक तथा स्काऊट मास्टर प्रवीण कुबल, क्रीडाशिक्षक सुरेंद्र यादव आदी उपस्थित होते.
.......................
84192
शिडवणे शाळेमध्ये ‘वृक्षाबंधन’ उपक्रम
तळेरे : रक्षाबंधना सणानिमित्त शिडवणे क्र. १ शाळेतील विद्यार्थ्यांनी पर्यावरण संवर्धनाचा संदेश दिला. भगतसिंग स्काऊट पथक आणि छत्रपती शिवाजी महाराज कब पथकाच्या माध्यमातून विद्यार्थ्यांनी झाडांना राख्या बांधून ''वृक्षाबंधन'' हा आगळावेगळा उपक्रम राबवला. विद्यार्थ्यांनी स्वतः बनविलेल्या राख्या शाळा परिसरातील झाडांना बांधल्या. शाळेने ''एक पेड माँ के नाम'' हा उपक्रम सुरू केला असून, विद्यार्थ्यांनी आपल्या घरी व शाळेच्या आवारात झाडे लावून त्यांची निगा राखण्याची शपथ घेतली आहे. या उपक्रमाने त्यांच्या संकल्पास बळकटी मिळाली. यावेळी स्काऊट मास्टर तथा शाळेचे मुख्याध्यापक प्रवीण कुबल, फ्लॉक लीडर सीमा वरुणकर, अंगणवाडी सेविका प्रियांका पाटणकर, पोषण आहार सेविका समिता सुतार उपस्थित होत्या. या उपक्रमाबद्दल सर्वत्र कौतुक होत आहे.