पावसाने व्यावसायिकांची चिंता वाढवली

पावसाने व्यावसायिकांची चिंता वाढवली

ऐन गणेशोत्सवात उलाढालीवर परिणामाची शक्यता

सकाळ वृत्तसेवा
देवगड, ता. १३ ः विश्रांतीनंतर किनारी भागात सुरू झालेल्या पावसाने स्थानिक व्यावसायिकांची चिंता वाढवली आहे. आगामी गणेशोत्सवाच्या निमित्ताने बाजारपेठेत होणाऱ्या संभाव्य उलाढालीवर पावसाने प्रश्‍नचिन्ह निर्माण केले आहे. त्यामुळे स्थानिक व्यापारी चिंतेत पडले आहेत. दरम्यान, तालुक्याच्या किनारी भागात पावसाची रिपरिप दिवसभर सुरू होती.
कोकणातील सर्वोच्च समजला जाणारा गणेशोत्सव आता तोंडावर आला आहे. त्यामुळे किराणा व्यावसायिकांपासून सजावट साहित्य विक्रेते, मकर विक्रेते तसेच विद्युत रोषणाई साहित्य विक्रेत्यांची लगबग सुरू झाली होती. आता व्यावसायिक आपापली दुकाने सजवण्याच्या तयारीत आहेत. पंधरा दिवसांवर गणेशोत्सव येऊन ठेपल्याने व्यावसायिक आपापल्या नियोजनात आहेत. अशावेळी उत्सवाच्या तोंडावर व्यावसायिक मांडणी करण्याच्या वेळीच पावसाने सुरुवात केल्याने चिंता वाढली आहे. गेले काही दिवस पावसाची उघडीप होती. अधूनमधून पावसाच्या किरकोळ सरी पडत असल्या तरी त्यामध्ये सातत्य नव्हते. अधूनमधून कडक ऊनही पडत होते. त्यामुळे सर्वच बाबतीत सोयीचे चित्र होते; मात्र काल (ता. १२) सायंकाळपासून किनारी भागात पावसाला सुरुवात झाली. आज दुपारपासून पावसाची संततधार सुरू आहे. त्यामुळे ऐन गणेशोत्सवाच्या तोंडावरच पावसाचे झालेले पुनरागमन व्यावसायिकांची चिंता वाढवणारे ठरण्याची शक्यता आहे. उत्सवाच्या निमित्ताने बाजारात अपेक्षित उलाढाल होण्याची आशा असते; मात्र त्याला पावसाने ब्रेक तर लागणार नाही ना० अशी चिंता व्यावसायिकांना सतावत आहे. सणाच्या सुरुवातीला किराणा बाजार खरेदी करण्यासाठी नागरिकांची लगबग असते. श्री गणेशाच्या नैवद्यासाठी लागणारे किराणा साहित्य खेरदी करण्यावर पहिल्या टप्प्यात जोर असतो. सध्या किराणा व्यावसायिक व्यापार होण्याच्या आशेवर आहेत. त्यादृष्टीने दुकानात त्यांनी मालाची तयारी केली आहे, परंतु पावसामुळे व्यवसायावर त्याचा परिणाम जाणवण्याची शक्यता असल्याने व्यापारी चिंतेत पडले आहेत. पाऊस असला तरीही श्री गणेशाच्या आराधनेत काही कमी राहता नये, अशी भक्तांची भावना असल्याने खरेदी केली जाईल, परंतु पावसामुळे एकूणच उलाढालीवर परिणाम जाणवण्याची भीती आहे. त्यामुळे ही बाब व्यापार्‍यांची चिंता वाढवणारी ठरू शकते.
....................
चित्रशाळांमध्ये लगबग वाढली
गणेशोत्सव पंधरा दिवसांवर येऊन ठेपल्याने गावागावांतील गणेश चित्रशाळांमधील लगबग वाढली आहे. उत्सवापूर्वी किमान दोन दिवस आधी गणेशमूर्ती तयार असणे अपेक्षित असते. यंदा उत्सव काहीसा लवकर आला आहे. त्यामुळे मूर्तिकारांची धांदल आहे. त्यातच किनारी भागात पावसाची सुरुवात झाल्याने गणेशमूर्ती वाळण्याचीही चिंता आहे. पावसाची उघडीप असल्यावर कामाला वेग असतो; मात्र पाऊस पडत असताना काहीसे अडचणीचे ठरू शकते.