-दहीहंडी उत्सवाला यावर्षी राजकीय रंग

दहीहंडी उत्सवाला यंदा राजकीय रंग
आगामी निवडणूक ; पक्षांतर्गत गटबाजीने रंगत
सकाळ वृत्तसेवा
चिपळूण, ता. १३ ः तालुक्यात दहीहंडी उत्सवाला यावर्षी राजकीय रंग चढला आहे. गोविंदाच्या थरांबरोबरच राजकीय थरही रचले जाणार आहेत. तालुक्यातील राजकीय वातावरण, पक्षांतर्गत गटबाजी तसेच येणाऱ्या जिल्हा परिषद, पंचायत समिती व नगरपालिका निवडणुका या साऱ्या पार्श्वभूमीवर यावर्षीची दहीहंडी राजकीय कुरघोडीचे मैदान ठरणार आहे.
अलीकडच्या काळात दहीहंडी आणि गोपाळकाला हे केवळ धार्मिक-सांस्कृतिक उत्सव न राहता सार्वजनिक व राजकीय इव्हेंटमध्ये परावर्तित झाले आहेत. अनेक ठिकाणी राजकीय नेते आपली ताकद दाखवण्यासाठी मोठ्या बक्षिसांच्या दहीहंड्या लावत आहेत. चिपळूण तालुका त्याला अपवाद नाही. मागील पाच वर्षांत जिल्ह्याच्या राजकारणात मोठे उलथापालथीचे टप्पे आले असून, त्याचे पडसाद आता चिपळुणातील उत्सवात उमटत आहेत. यावर्षी तालुक्यात तब्बल लहान-मोठ्या ४१२ दहीहंड्या उभारल्या जाणार आहेत. यापैकी १७ सार्वजनिक तर उर्वरित खासगी आहेत. राजकीय पक्षाकडून गोविंदांना लाखो रुपयांच्या बक्षिसांचे लोणी दाखवले जात आहे. काही ठिकाणी एक लाखाहून अधिक रकमेच्या दहीहंड्या लावल्या जात असून, एकमेकांवर कुरघोडी करण्यासाठी त्याहून जास्त रकमेची दहीहंडी उभारण्याची स्पर्धा सुरू आहे; मात्र लाखाची रक्कम गोविंदा पथकाला मिळू नये म्हणून जास्त उंच दहीहंडी बांधण्याचा प्रकारसुद्धा सुरू आहे.
भाजीमंडई परिसरात रमेश कदम मित्रमंडळाकडून दहीहंडी उभारली जाणार आहे. भाजप आणि आमदार शेखर निकम यांच्या मित्रमंडळाकडून चिंचनाका परिसरात दहीहंडी उभारली जाणार आहे. त्याच परिसरामध्ये शिवाजीनगर रिक्षा स्थानक मित्रमंडळाकडून दहीहंडी उभारली जाणार आहे. इंदिरा गांधी सांस्कृतिक केंद्र परिसरात महाराष्ट्र नवनिर्माण सेनातर्फे दहीहंडी उभारली जाते. बाजारपेठेत व्यापारी मित्रमंडळातर्फे आणि भाजीमंडई येथील व्यापाऱ्यांकडून स्वतंत्र दहीहंडी लावली जाते. पिंपळी येथे दसपटी शिवसेना विभागातर्फे दहीहंडी उभारण्यात आली आहे. शिरगाव येथे व्यापारी मित्रमंडळातर्फे दरवर्षी उभारली जाते. यावर्षीच्या उत्सवात गोविंदांसाठी फक्त बक्षीसच नव्हे तर राजकीय पक्षांचे टी शर्ट, टोप्या, पट्ट्या अशा प्रचारात्मक वस्तूंचीही मागणी वाढली आहे. त्यामुळे पारंपरिक ढाकूमाकूमच्या तालाबरोबरच राजकीय घोषणाही कानावर पडण्याची शक्यता आहे.