माडखोलमधील पथदीपांचे बल्ब ब्रॅकेटसहित बसवा

84267

माडखोलमधील पथदीपांचे
बल्ब ब्रॅकेटसहित बसवा

ग्रामस्थांची मागणी; ग्रामपंचायतीस निवेदन

सकाळ वृत्तसेवा
सावंतवाडी, ता. १३ ः माडखोल गावातील पथदीप ब्रॅकेटशिवाय बसविण्यात आल्याने ऊन, वारा व पाऊस यामुळे ते खराब झाल्याने रात्रीच्या वेळी गावातील रस्त्यावर अंधार पसरतो. परिणामी ग्रामस्थांना रस्त्यावरून चालताना धोका पत्करावा लागतो. त्यामुळे हे बल्ब १९ ऑगस्टपूर्वी ब्रॅकेट बसवून लावण्यात यावे; अन्यथा २० ऑगस्टला आंदोलन करण्याचा इशारा ग्रामस्थ राजकुमार राऊळ यांच्यासह अन्य ग्रामस्थांनी माडखोल सरपंच यांना निवेदनाद्वारे दिला.
श्री. राऊळ यांनी याबाबत पत्रक प्रसिद्धीस दिले. त्यात म्हटले की, ग्रामपंचायतीने गावातील रस्त्यांवर पथदीप बसविताना ब्रॅकेटशिवाय बल्ब बसवले आहेत. त्यामुळे पावसाळ्यात किंवा उन्हाळ्यात हे बल्ब खराब होऊन लागलीच बंद पडतात. सद्यस्थितीत गावातील बरेचसे बल्ब अशाच प्रकारांमुळे बंद स्थितीत असल्याने रात्रीच्या वेळी रस्त्यावर अंधार पसरतो. परिणामी ग्रामस्थांना रस्त्यावरून चालताना धोका पत्करावा लागतो. हे बल्ब ब्रॅकेट बसवून बसवण्यात यावेत, यासाठी ग्रामसभेत ठरावही घेण्यात आला आहे. या ठरावाची पूर्तता करताना २० ऑगस्टपूर्वी सर्व बल्ब ब्रॅकेटसह बसवून द्यावेत. गावाचे सरपंच गावात राहत नसून ते सावंतवाडीमध्ये राहतात. त्यांनी कायमस्वरुपी गावात राहूनच जनतेच्या अडीअडचणी समजून घ्यावात, अशीही मागणी राऊळ व ग्रामस्थांनी केली आहे.