आरवली-माखजन रस्त्यावर खड्ड्याचे साम्राज्य

आरवली-माखजन रस्त्यावर खड्डेच खड्डे
वाहनचालकांची कसरत ; बांधकाम विभागाचे दुर्लक्ष
सकाळ वृत्तसेवा
संगमेश्वर, ता. १४ ः संगमेश्वर तालुक्यातील आरवली ते माखजन या मुख्य मार्गांवर मोठमोठे खड्डे पडलेले आहेत. त्यामधून प्रवास करताना वाहनचालकांसह ग्रामस्थांना कसरत करावी लागत आहे.
आरवली ते माखजन या मार्गावर कोंडीवरे-बुरंबाड-सरंद आदी ठिकाणी खड्डे पडल्यामुळे हा रस्ता अपघाताला निमंत्रण देत आहे. कोंडीवरे येथील खड्ड्यांमध्ये माखजन येथील एका दुचाकीला झालेल्या अपघातात स्वाराच्या हाताला दुखापत झाली होती तसेच या मार्गांवरून दररोज लहान मुलांचा शाळेसाठी प्रवास सुरू असतो. खड्डे चुकवण्याच्या नादात वाहनचालक पादचाऱ्याच्या अंगावर वाहन जाण्याची भीती असते. अवघ्या काही दिवसांवर गणेशाचे आगमन होणार आहे. त्यामुळे या मार्गावरून येणारा चाकरमानी खड्ड्यातून येणार का, असा प्रश्न ग्रामस्थांनी उपस्थित केला आहे. बाजूची झुडपे व नालेसफाई न झाल्यामुळे सध्या या मुख्य मार्गाची अवस्था बिकट झाली आहे. बांधकाम विभागाचा अधिकारी व ठेकेदार यांचे पूर्णपणे दुर्लक्ष झाले असून, त्याचा त्रास सर्वसामान्य जनतेला होत आहे.
---
कोट
मागील अनेक दिवसांपासून या मार्गाची अवस्था दयनीय झाली आहे. लोक खड्ड्यात पडून जखमी होत आहेत. तरीही बांधकाम विभाग याकडे दुर्लक्ष करत आहे. एखाद्या प्रवाशाचा मृत्यू झाल्यावर खड्डे व रस्ता दुरुस्त करणार का?
- बाबू मोरे, शाखाप्रमुख मावळंगे, ठाकरे शिवसेना