धाकोरे सार्वजनिक रस्ता खुला करा

84786

धाकोरे सार्वजनिक रस्ता खुला करा

सावंतवाडीत ग्रामस्थांची मागणी; प्रशासनाकडून दखल

सकाळ वृत्तसेवा
सावंतवाडी, ता. १६ ः धाकोरे येथील रहिवासी आत्माराम नारायण साटेलकर आणि ग्रामस्थांनी गेल्या अनेक वर्षांपासून अडथळाग्रस्त असलेल्या सार्वजनिक रस्त्यासाठी आज पुन्हा येथील तहसीलदार कार्यालयासमोर उपोषण सुरू केले. भूमिअभिलेख कार्यालयाकडून या रस्त्याची मोजणी करून यातून मार्ग काढण्याचे लेखी आश्वासन दिल्याने त्यांनी उपोषण मागे घेतले.
होळीचे भाटले ते अशोक साटेलकर आणि तेथून रघुनाथ मुळीक यांच्या घरापर्यंतचा हा आठ फूट रुंदीचा रस्ता अतिक्रमणामुळे पूर्णपणे बंद झाला आहे. यापूर्वी २६ जानेवारी आणि १ मे रोजी उपोषण केले होते. दोन्ही वेळा प्रशासनाने कारवाईचे आश्वासन दिले होते. मात्र, ती आश्वासने केवळ कागदावरच राहिली. १ मे रोजी तर ग्रामपंचायत आणि गटविकास अधिकाऱ्यांनी ३० दिवसांच्या आत अतिक्रमण काढून रस्ता डांबरीकरण करण्याचे लेखी आश्वासन दिले होते. मात्र, तेही पूर्ण झाले नाही, असे ग्रामस्थांनी सांगितले.
रस्त्यावरील सर्व अतिक्रमणे काढून रस्ता पूर्णपणे खुला करावा, मोकळा झालेला रस्ता कायदेशीररीत्या पक्का करून वाहतुकीस योग्य बनवावा, तसेच रस्त्याचे डांबरीकरण करून तो मजबूत बनवण्याची मागणीही साटेलकर यांनी केली. जोपर्यंत मागण्या पूर्ण होऊन रस्ता पूर्णपणे मोकळा होत नाही, तोपर्यंत उपोषण सुरू ठेवण्याचा निर्धार ग्रामस्थांनी केला आहे. यावेळी उपोषणकर्ते आत्माराम साटेलकर, धाकोरे माजी सरपंच अजित नातू, मिलन आसोलकर, सिद्धेश गोवेकर, दिगंबर गोवेकर, मोहन मुळीक, सुरेश आसोलकर, साक्षी गोवेकर, स्मिता गोवेकर, रुचिता पालयेकर आदी उपस्थित होते. तहसीलदार, तसेच भूमिअभिलेखच्या अधिकाऱ्यांनी उपोषणकर्त्यांशी चर्चा केली. रस्त्याची मोजणी करून रस्ता मोकळा करून देण्यासाठी प्रयत्न करू, असे लेखी आश्वासन त्यांनी दिले.