मिलाग्रीस हायस्कूलमार्फत स्वातंत्र्य दिनानिमित्त रॅली

मिलाग्रीस हायस्कूलमार्फत
स्वातंत्र्य दिनानिमित्त रॅली
सावंतवाडी, ता. १६ ः भारताच्या स्वातंत्र्यदिनाच्या निमित्ताने येथिल मिलाग्रीस हायस्कूलतर्फे ‘आझादी का अमृत महोत्सव’ मोहिमेअंतर्गत भव्य रॅलीचे आयोजन करण्यात आले. देशभक्ती आणि देशप्रेम जनमानसात जागृत करण्याच्या उद्देशाने आयोजित या उपक्रमात १०० विद्यार्थी आणि ५० शिक्षकांसह मुख्याध्यापकांनी उत्साहाने सहभाग घेतला.
यातील १२५ फुटी लांबीचा तिरंगा ध्वज लक्षवेधी ठरला. रॅलीची सुरुवात सर्व सहभागी विद्यार्थी आणि शिक्षकांच्या उपस्थितीत निर्माण भवन येथून झाली. ही रॅली जगन्नाथराव भोसले उद्यानमार्गे पुढे सरकली. मोती तलाव काठावरून मार्गक्रमण करत केशवसुत कट्ट्याजवळील शिवरामराजे पुतळ्यापाशी पोहोचली. या ठिकाणी रॅलीचा समारोप झाला. विद्यार्थ्यांनी ‘भारत माता की जय’, ‘वंदे मातरम्'' अशा घोषणा देत परिसर दणाणून सोडला. सव्वाशे फुटांचा तिरंगा ध्वज या रॅलीचे खास आकर्षण ठरला. या रॅलीच्या माध्यमातून मिलाग्रीस हायस्कूलने समाजात देशभक्तीचा संदेश पोहोचविण्याचा प्रयत्न केला. या कार्यक्रमात सावंतवाडी पोलिस ठाण्याचे अधिकारी व कर्मचाऱ्यांचाही सहभाग होता. मुख्याध्यापक फादर रिचर्ड सालदाना, पर्यवेक्षिका संध्या मुणगेकर, मराठी प्रायमरीच्या मुख्याध्यापिका सिस्टर कविता चांदी, इंग्लिश प्रायमरीच्या पर्यवेक्षिका क्लिटा परेरा आदी उपस्थित होते.