बांधकाम कामगारांना लवकरच साहित्य वाटप

swt1833.jpg
85269
प्राजक्त चव्हाण

बांधकाम कामगारांना
लवकरच साहित्य वाटप
प्राजक्त चव्हाणः सुधारित योजना
सकाळ वृत्तसेवा
कुडाळ, ता. १८ः महाराष्ट्र इमारत व इतर बांधकाम कामगार कल्याण मंडळअंतर्गत बांधकाम कामगारांना अत्यावश्यक संच भेट देण्यात येणार आहे. महाराष्ट्र शासनाकडून अत्यावश्यक संच सुधारित योजनेस मान्यता देण्यात आली आहे, अशी माहिती श्रमिक कामगार संघटना अध्यक्ष प्राजक्त चव्हाण यांनी दिली.
याबाबत चव्हाण यांनी पत्रक प्रसिध्दीस दिले आहे. त्यात म्हटले आहे की, इमारत व इतर बांधकाम क्षेत्रात काम करणाऱ्या कामगारांच्या कल्याणासाठी तसेच बांधकाम कामगार व त्यांच्या कुटुंबियांच्या आरोग्य, सुरक्षा आणि कल्याणासाठी शासनाकडून अनेक योजनांची अंमलबजावणी केली जात आहे. शासनाने पात्र नोंदीत बांधकाम कामगारांना अत्यावश्यक संच वितरण योजनेस मान्यता दिली आहे. या संचामध्ये पत्र्याची पेटी, प्लास्टिक चटई, धान्य साठवण कोठी, बेडशीट, चादर, ब्लॅंकेट, साखर व चहा पावडर ठेवण्यासाठी डबा, वॉटर प्युरिफायर या वस्तूंचा समावेश आहे. लवकरच या संदर्भातील निविदा प्रक्रिया राबवून कामगार बांधवांना लाभ देण्यात येणार आहे. प्रमाणित केलेल्या पात्र यादीनुसारच वितरण केले जाणार आहे. नव्याने नोंदणी केलेल्या कामगारांना सुरक्षा संच वितरणास मान्यता दिली असून, लवकरच पुढील कार्यवाही केली जाणार आहे.