सावंतवाडी येथे नाट्यमहोत्सवास प्रारंभ

85331

सावंतवाडी येथे नाट्यमहोत्सवास प्रारंभ

संजू परब यांच्या वाढदिनानिमित्त आयोजन; रसिकांचा प्रतिसाद

सकाळ वृत्तसेवा
सावंतवाडी, ता. १८ ः शिवसेना जिल्हाप्रमुख सच्चिदानंद ऊर्फ संजू परब यांच्या वाढदिवसानिमित्त सावंतवाडीमध्ये आयोजित तीनदिवसीय नाट्यमहोत्सवाचा प्रारंभ माजी उपनगराध्यक्ष राजन पोकळे यांच्या हस्ते झाला. ‘भगदत्त वधर’ या नाटकाचा प्रारंभी प्रयोग सादर करण्यात आला. याला रसिकांचा भरभरून प्रतिसाद मिळाला.
येथील गोविंद चित्रमंदिरात उत्सवाचे आयोजन केले आहे. यावेळी नारदाची भूमिका साकारणारे ज्येष्ठ दशावतार कलावंत विठ्ठल गांवकर यांचा सत्कार करण्यात आला. याप्रसंगी माजी जिल्हाप्रमुख अशोक दळवी, तालुकाप्रमुख नारायण ऊर्फ बबन राणे, वेंगुर्ला तालुकाप्रमुख नितीन मांजरेकर, उपजिल्हाप्रमुख विनायक दळवी, महिला शहरप्रमुख भारती मोरे, झेवियर फर्नांडिस, वासुदेव होडावडेकर, सुहास कोळसुलकर, परिक्षीत मांजरेकर आदी उपस्थित होते. यावेळी श्री. पोकळे म्हणाले, ‘संजू परब यांच्या वाढदिवसानिमित्त तीनदिवसीय नाट्यमहोत्सव होत आहे. त्यांच्या रूपानं एक तडफदार नेतृत्व पक्षाला लाभले आहे. दीपक केसरकर यांच्या मार्गदर्शनाखाली व त्यांच्या नेतृत्वाखाली संघटनेची घौडदौड मतदारसंघात सुरू आहे. दशावतार कलेमुळे जिल्ह्याची ओळख सातासमुद्रापार गेली आहे. आमदार केसरकरांच्या माध्यमातून १५ दशावतार कंपन्यांना वाहने उपलब्ध करून दिली आहेत. श्री. परब यांच्या माध्यमातूनही या कलेला प्रोत्साहन मिळेल.’
माजी जिल्हाप्रमुख दळवी यांनी मतदारसंघात विविध उपक्रम राबविण्यात येत आहेत. परब त्यांच्यावर प्रेम करणारी माणसे जिल्ह्यात आहेत, असे सांगितले. तालुकाप्रमुख राणे यांनी संजू परब यांच्या वाढदिवसानिमित्त सामाजिक, सांस्कृतिक कार्यक्रम शिंदे शिवसेना राबवित आहेत. गोरगरीबांसाठी धावून जाणारे हे नेतृत्व आहे, असे सांगितले. आमदार दीपक केसरकर यांना वारसा संजू परब निश्चित जोपासतील. येणाऱ्या स्थानिक स्वराज्य संस्थांच्या निवडणुकांत त्यांच्या नेतृत्वाखाली शिंदे शिवसेनेला मोठे यश मिळेल, असा विश्वास वेंगुर्ला तालुकाप्रमुख मांजरेकर यांनी व्यक्त केला. भारती मोरे, विनायक दळवी आदींनीही मनोगत व्यक्त केली. विधानसभाप्रमुख प्रेमानंद देसाई यांनी सूत्रसंचालन केले. माजी नगरसेविका दीपाली सावंत, आबा केसरकर, सुजित कोरगावकर, अर्चित पोकळे, निखिल सावंत, पूजा सोन्सुरकर आदी उपस्थित होते. आज ‘राजा सोमदत्त अर्थात सदोबा पाटील’, तर महोत्सवाच्या शेवटच्या दिवशी प्रसिद्ध ऐतिहासिक नाटक ‘रायगडाला जेव्हा जाग येते’ हा नाट्यप्रयोग सादर केला जाणार आहे.