ओटवणे परिसरात कोल्ह्याचा वावर

90673

ओटवणे परिसरात
कोल्ह्याचा वावर
सकाळ वृत्तसेवा
ओटवणे, ता. १० ः सध्या दुर्मीळ होत चाललेली आणि नष्ट होण्याच्या मार्गावर असणाऱ्या कोल्ह्याच्या प्रजातीचा मुक्त संचार ओटवणे परिसरात पाहायला मिळत आहे. आज दुपारी हा प्राणी रस्त्यावरून एखाद्या पाळीव प्राण्यासारखा बिनधास्त फिरताना ग्रामस्थांना आढळला. या मार्गातून जाणारे ओटवणे पोलिसपाटील शेखर गावकर यांना त्याचा व्हिडिओ काढण्याचा मोह आवरता आला नाही. त्यांनी हा व्हिडिओ काढून माध्यमांवर प्रसिद्ध केला; मात्र हा प्राणी नेमका कोल्हा की पूर्वी ‘कोल्हेसुंडे’ म्हणून ओळखली जाणारी शिकारी जंगली कुत्र्यांची जात, यावर मतमतांतरे होती. अनेकांनी हा व्हिडिओ बघितल्यानंतर हा प्राणी म्हणजे कोल्हाच असल्याचा निष्कर्ष काढला. प्राण्यांच्या अनेक प्रजाती सध्या दुर्मीळ होत असताना अशा प्राण्यांचे होणारे दर्शन म्हणजे त्यांचे अस्तित्व अजूनही असल्याचे सिद्ध होत आहे. बेसुमार जंगलतोडीमुळे अधिवास कमी झाल्याने खाण्याच्या शोधात सध्या इतर प्राण्यांबरोबर कोल्हा वस्तीत फिरताना पाहायला मिळत आहे.