महिला लोकशाही दिन सोमवारी

महिला लोकशाही
दिन सोमवारी
सिंधुदुर्गनगरी : जिल्हास्तरीय महिला लोकशाही दिन सोमवारी (ता. १५) सकाळी ११ ते दुपारी १ या वेळेत जिल्हाधिकारी कार्यालय सिंधुदुर्गनगरी येथे आयोजित करण्यात आला आहे. समस्याग्रस्त व पीडित महिलांनी शासनाने उपलब्ध करून दिलेल्या व्यासपीठाचा उपयोग अडचणी सोडविण्यासाठी करावा, असे आवाहन जिल्हा महिला व बाल विकास अधिकारी बी. जी. काटकर यांनी केले. समस्याग्रस्त व पीडित महिलांना त्यांचे प्रश्न मांडण्यासाठी व्यासपीठ मिळावे, त्यांच्या तक्रारी व अडचणी शासकीय यंत्रणेकडून सोडविण्‍यासाठी एक प्रभावी उपाययोजना म्हणून जिल्हास्तरावर दर महिन्याच्या तिसऱ्या सोमवारी, सार्वजनिक सुटी असल्यास येणाऱ्या कामकाजाच्या दिवशी जिल्हास्तरीय महिला लोकशाही दिन राबविण्यात येतो.
महिलांनी त्यांच्या अडचणी मांडण्यासाठी विहित नमुन्यातील अर्ज जिल्हा महिला व बालविकास अधिकारी कार्यालय, सिंधुदुर्गनगरी, ओरोस येथून उपलब्ध करून घ्यावेत, असे आवाहन केले आहे.

दिव्यांग बालकांसाठी
२७ सप्टेंबरला शिबिर
सिंधुदुर्गनगरी : जिल्हा विधी सेवा प्राधिकरण, सिंधुदुर्ग आरोग्य विभाग, महिला व बाल विकास विभाग, दिव्यांग विभाग व जिल्ह्यातील दिव्यांगांसाठी काम करणाऱ्या सर्व शासकीय शाळा व अशासकीय संस्था यांच्यामार्फत दिव्यांग बालकांची ओळख, तपासणी करण्यासाठी जिल्ह्यामध्ये २ ऑक्टोबरला शिबिराचे आयोजन करण्यात आले होते; परंतु या दिवशी दसरा सण असल्याने या तारखेमध्ये बदल करण्यात आला आहे. हे शिबिर २७ सप्टेंबरला सावंतवाडी येथे घेण्यात घेणार आहे. जिल्ह्यातील दिव्यांग मुलांचे सर्वेक्षण करून त्यांना विविध प्रकारच्या शासकीय योजनांचा लाभ, दिव्यांग मुलांचे आयुष्मान भारतकार्ड, आभाकार्ड, आधारकार्ड, युनिक डिसेबिलिटी ओळखपत्र व वैद्यकीय तपासणी अशा विविध प्रकारचे लाभ मिळण्याकरिता या शिबिराचे आयोजन करण्यात आले आहे, असे जिल्हा विधी सेवा प्राधिकरणाचे अध्यक्ष डॉ. सुधीर देशपांडे यांनी सांगितले. अधिक माहितीसाठी जिल्हा विधी सेवा प्राधिकरणाच्‍या सचिव संपूर्णा गुंडेवाडी यांच्याशी संपर्क साधावा, असे आवाहन केले आहे.