खारेपाटण प्रशालेचे विद्यार्थी चमकले

swt119.jpg
90793
कसाल ः जिल्हास्तरीय कला उत्सव स्पर्धेमध्ये यश मिळविलेल्या खारेपाटण हायस्कूलच्या विद्यार्थ्यांसोबत उपस्थित मान्यवर.

खारेपाटण प्रशालेचे विद्यार्थी चमकले
जिल्हास्तरीय ''कला उत्सव'' ः गायन, समूह वादन, कथाकथनात यश
सकाळ वृत्तसेवा
तळेरे, ता. ११ : राज्य शैक्षणिक संशोधन व प्रशिक्षण परिषद महाराष्ट्र, पुणे यांच्या वतीने घेण्यात आलेल्या जिल्हा शिक्षण व प्रशिक्षण संस्था सिंधुदुर्गतर्फे आयोजित जिल्हास्तरीय ''कला उत्सव २०२५'' या स्पर्धेमध्ये शेठ नवीनचंद्र मफतलाल विद्यालय खारेपाटणच्या विद्यार्थ्यांनी नेत्रदीपक यश मिळविले. कसाल हायस्कूल येथे झालेल्या या स्पर्धेत जिल्ह्यातील बहुसंख्य माध्यमिक विद्यालयांनी सहभाग घेतला.
गायन (एकल) प्रकारामध्ये प्राजक्ता ठाकूर-देसाई हिने प्रथम क्रमांक प्राप्त केला. तिने ''मी पुन्हा वनांतरी'' हे नाट्यगीत सादर करत उपस्थितांना मंत्रमुग्ध केले. देशभक्तीपर समूहगीत गायनात अनुक्षा पतयाण, तेजल ठाकूर-देसाई, सानिया पवार, दुर्वा राऊत यांनी ''करेंगे भारत निर्माण'' हे गीत सादर केले. या गीताला प्रशालेचे संगीत शिक्षक संगीत अलंकार संदीप पेंडुरकर यांनी संगीतबद्ध केले. समूह वाद्य वादनात आर्या मोसमकर, आयुष मांगले, वंश कानडे, अनुष्का ठोसर, सुमित ठोसर यांनी लोकसंगीत वाद्यमेळ वादन सादर करून सर्वांची वाहवा मिळविली. त्यांना श्रीधर पाचंगे व प्रशालेचे माजी विद्यार्थी मयूर जाधव यांचे मार्गदर्शन मिळाले. कथाकथन स्पर्धेमध्ये दुर्वा चिके व श्रुती जामसांडेकर यांनी द्वितीय क्रमांक पटकावला. स्पर्धेतील प्रथम क्रमांक विजेत्या विद्यार्थ्यांची विभागीय स्तरासाठी निवड झाली. या सर्व स्पर्धकांना संगीत शिक्षक पेंडूरकर यांचे मार्गदर्शन लाभले.
या यशाबद्दल खारेपाटण पंचक्रोशी शिक्षण प्रसारक मंडळाचे अध्यक्ष प्रवीण लोकरे, सर्व संचालक मंडळ, जिल्हा शिक्षण व प्रशिक्षण संस्थेचे प्राचार्य डॉ. राजेंद्र कांबळे, मुख्याध्यापक संजय सानप, पर्यवेक्षक संतोष राऊत, सर्व शिक्षक व शिक्षकेतर कर्मचारी यांच्यातर्फे सर्व विद्यार्थी व मार्गदर्शक शिक्षकांचे अभिनंदन करण्यात आले.