निगुडेत नळपाणी योजनेत अपहार

91120

निगुडेत नळपाणी योजनेत
अपहार ः संतोष राणे

माहितीच्या अधिकारात उघड

सकाळ वृत्तसेवा
बांदा, ता. १२ ः निगुडे ग्रामपंचायतीच्या माध्यमातून केलेल्या नळपाणी योजनेच्या कामात अनावश्यक खर्च दाखवून आर्थिक अपहार झाल्याचा आरोप सामाजिक कार्यकर्ते संतोष राणे यांनी केला आहे. विशेष म्हणजे जुना दर प्रति युनिट ११ रुपये असताना तो सहा रुपये असल्याचे सांगून ग्रामस्थांची दिशाभूल केली जात असल्याचे त्यांचे म्हणणे आहे. याबाबत त्यांनी माहितीच्या अधिकारात माहिती मागितल्यानंतर हा सर्व प्रकार उघड झाला. त्यानंतर या प्रकाराची पालकमंत्र्यांकडून चौकशी व्हावी, अन्यथा न्यायालयात धाव घेऊ, असा इशारा त्यांनी दिला आहे.
याबाबत त्यांनी दिलेल्या प्रसिद्धी पत्रकात म्हटले आहे की, श्री. राणे यांनी ग्रामपंचायतीकडे पाणी पुरवठा आणि पाणी बिलांसंदर्भात माहिती अधिकारात माहिती मागवली होती. मात्र, ग्रामपंचायतीने दिलेली माहिती अर्धवट आणि चुकीची असल्याचा आरोप राणे यांनी केला आहे. पाणी बिलांचा जुना दर प्रति युनिट ११ रुपये असताना, तो ६ रुपये असल्याचे सांगून ग्रामस्थांची दिशाभूल केली जात असल्याचे त्यांचे म्हणणे आहे. ​याशिवाय, नळ योजनेच्या कामासाठी अनावश्यक खर्च दाखवून पैसे हडपल्याचाही आरोप राणे यांनी केला आहे. ग्रामसेविका आणि जन माहिती अधिकाऱ्यांनी संगनमत करून ही खोटी माहिती दिल्याचा दावा त्यांनी केला आहे. ​या गैरकारभाराची योग्य चौकशी करून कारवाई न झाल्यास पालकमंत्री तसेच जिल्हाधिकाऱ्यांकडे तक्रार करून कोर्टात मानहानीचा दावा दाखल करण्याचा इशारा राणे यांनी दिला आहे.