गाव विकास समितीचे धरणे आंदोलन स्थगित

गावविकास समितीचे आंदोलन स्थगित
सकाळ वृत्तसेवा
साडवली, ता. १३ ः श्री क्षेत्र मार्लेश्वर देवस्थानच्या पर्यटन विकासासाठी प्रशासनाकडे पाठपुरावा करणाऱ्या गावविकास समितीने १५ सप्टेंबरला देवरूख तहसील कार्यालयासमोर होणारे लक्षवेधी धरणे आंदोलन तूर्तास स्थगित केले आहे. जिल्हा प्रशासनाचे मार्लेश्वर पर्यटन विकासाबाबत काय धोरण आहे, याची माहिती घेतल्यानंतर आंदोलनाची पुढील दिशा ठरवली जाणार आहे. समितीचे शिष्टमंडळ लवकरच जिल्हाधिकाऱ्यांची भेट घेणार आहे.
या संदर्भात गावविकास समितीच्या अनघा कांगणे यांनी तहसीलदारांना निवेदन दिले आहे. मार्लेश्वर देवस्थानच्या पर्यटन विकासाचा आराखडा जाहीर करावा, अशी मागणी गावविकास समिती प्रशासनाकडे करत आहे. या मागणीकडे लक्ष वेधण्यासाठी समितीने लक्षवेधी धरणे आंदोलनाची घोषणा केली होती; मात्र आता या विषयावर समितीचे शिष्टमंडळ जिल्हाधिकारी यांची भेट घेणार आहे. या भेटीत मार्लेश्वर येथील पर्यटन विकासाबाबत निवेदन दिले जाईल. जिल्हाधिकाऱ्यांच्या भेटीनंतर पुढील दिशा निश्चित केली जाईल, असे समितीने स्पष्ट केले आहे.