राजापूर-तिवरेत डाकपालाकडून २ लाख २३ हजाराचा अपहार

तिवरेतील डाकपालाने केला
२ लाख २३ हजारांचा अपहार
गुन्हा दाखल ः व्याजासह रक्कम वसूल
राजापूर, ता. १३ ः पोस्टातील बचत खात्यात जमा करण्यासाठी दिलेल्या खातेदारांचे पैसे स्वतःजवळ ठेवत खोट्या सह्या, अंगठे लावून खात्यातील पैसे काढून सुमारे २ लाख २३ हजार रुपयांचा अपहार तिवरे येथील शाखा डाकपाल यांनी केला. याप्रकरणी संशियत शाखा डाकपाल अमोल एकनाथ गोतावडे याच्या विरोधात राजापूर पोलिस ठाण्यात गुन्हा दाखल केल्याची माहिती राजापूर पोलिसांनी दिली.
याप्रकरणी राजापूरचे डाकघर निरीक्षक योगेश प्रकाश जाधव यांनी राजापूर पोलिस ठाण्यात फिर्याद दिली. त्यामध्ये संशयित अमोल एकनाथ गोतावडे (वय २९, रा. गोतावडेवाडी, राजापूर) यांनी ९ ऑगस्ट २०२३ ते २८ सप्टेंबर २०२३ या कालावधीत पदाचा गैरवापर करून ११ खातेदारांच्या पोस्ट खात्यातील रकमेचा खोटे अंगठे व सह्या करून १ लाख ५१ हजार रुपये काढले. तसेच सत्यवती भानू सुद, ऋतुजा गणपत तारळ या खातेदारांचे नवीन खाते न उघडता त्यांनी बचत खात्यात ठेवण्यासाठी दिलेले ४० हजार रुपये स्वतःकडे ठेवले. शालिनी सहदेव साळवी, सुरेखा सुरेश गुजीर व स्वप्नाली अनाजी तरळ या तीन खातेदारांच्या बचत खात्यांमध्ये ३२ हजार ५०० रुपये जमा न करता स्वतःकडे ठेवले. असे एकूण १६ खातेदारांचे २ लाख २३ हजार ५०० रुपये घेऊन त्यांची फसवणूक करून अपहार केल्याचे फिर्यादीमध्ये नमूद केले आहे. दरम्यान, डाकघर निरीक्षक यांनी संशयिताकडून व्याजासह २ लाख ४२ हजार रुपये रक्कम हस्तगत केल्याचेही फिर्यादीत नमूद केले आहे. याप्रकरणी राजापूर पोलिसांनी संशयित अमोल गोतावडे याच्या विरोधात गुन्हा दाखल केला आहे.