अनुदानित शाळांचे वाढीव टप्प्यासाठी प्रस्ताव मागवले

वाढीव अनुदानाच्या टप्प्यासाठी प्रस्ताव मागवले
शिक्षण विभाग; २० टक्के मिळणार लाभ, जिल्ह्याचे उद्या प्रस्ताव
सकाळ वृत्तसेवा
सावर्डे, ता. १५ ः अंशतः अनुदानित तत्त्वावर सुरू असलेल्या प्राथमिक, माध्यमिक व उच्च माध्यमिक शाळांना १ ऑगस्ट २०२५ पासून वाढीव २० टक्के अनुदानाचा टप्पा द्या, असे आदेश पुणे येथील शिक्षण संचालक डॉ. महेश पालकर यांनी दिले आहेत. त्यानुसार कोल्हापूर शिक्षण उपसंचालक महेश चोथे यांनी कोल्हापूर विभागातील रत्नागिरी, सिंधुदुर्ग, सातारा, सांगली, कोल्हापूर जिल्ह्यातील उच्च माध्यमिक अंशतः अनुदानित शाळांचे वाढीव टप्प्यासाठी प्रस्ताव मागवून घेतले आहेत.
कोल्हापूर विभागात काही अंशतः अनुदानित कनिष्ठ महाविद्यालये २० टक्क्यावरून ४० टक्केसाठी पात्र झाली आहेत. तर काही अंशतः अनुदानित कनिष्ठ महाविद्यालये ४० टक्के वरून साठ-साठ टक्के वेतन अनुदानासाठी पात्र ठरत आहेत. मंत्रिमंडळाच्या निर्णयानुसार व शासकीय धोरणानुसार लाभार्थ्यांच्या खात्यात सप्टेंबरचा पगार वाढीव २० टक्के नुसार ऑक्टोबरमध्ये मिळणार आहे. शिवाय ऑगस्टचा फरकदेखील याच पगारात निघणार आहे. त्यामुळे कोल्हापूर विभागातील, लाभार्थी अंशतः अनुदानित शिक्षक, शासकीय ध्येय धोरणापासून वंचित राहू नये म्हणून शिक्षण विभागाकडून प्रयत्न सुरू आहेत. कोल्हापूर विभागातील प्रस्ताव १६ रोजी, सातारा व रत्नागिरी चे प्रस्ताव १७ रोजी तर सिंधुदुर्ग, सांगली आणि कोल्हापूरचे प्रस्ताव १८ रोजी मागविण्यात आले आहेत. प्रस्ताव स्वीकारण्याचे शिबिर सकाळी १० ते ५ या वेळेत कोल्हापूर एसएससी बोर्ड येथे होणार आहे. यासंबंधीचे पत्र १० सप्टेंबरला विभागातील सर्व मुख्याध्यापक व प्राचार्यांना पाठवले आहे. विभागातील कनिष्ठ महाविद्यालये अचूक प्रस्ताव बनवणे व सादर करणे या कामाला लागले आहेत. संघटनेचे पदाधिकारीही शिक्षकांना प्रस्ताव तयार करण्यासाठी मदत करत आहेत.