लांजा- प्रशासनाने कार्यवाही करावी, अन्यथा रस्ता रोको

rat१६p३९.jpg
९१९७०
लांजाः येथील घनकचरा प्रकल्पाविरोधात सुरू असलेल्या आंदोलनाच्या ठिकाणी आमदार भास्कर जाधव यांनी कोत्रेवाडी ग्रामस्थांची भेट घेतली.

कोत्रेवाडी घनकचरा प्रकल्पाविरोधी आंदोलन पेटले
प्रशासनाने कार्यवाही करावी अन्यथा रास्तारोको; भास्कर जाधव यांचा इशारा
सकाळ वृत्तसेवा
लांजा, ता. १६ः येथील कोत्रेवाडी ग्रामस्थांच्या घनकचरा प्रकल्पाविरोधात ३४ दिवसांपासून सुरू असलेल्या आंदोलनाची प्रशासनाकडून कोणतीच दखल घेतली जात नाही, हे अत्यंत चुकीचे आहे. प्रशासनाने तातडीने दखल घेऊन त्यावर योग्य ती कार्यवाही करावी. तसे न केल्यास रास्तारोको करू, असा इशारा ठाकरे शिवसेनेचे माजी मंत्री तथा आमदार भास्कर जाधव यांनी दिला आहे.
आमदार जाधव यांनी मंगळवारी (ता. १६) दुपारी कोत्रेवाडीतील उपोषणाला बसलेल्या ग्रामस्थांची भेट घेतली. जिल्हाधिकारी यांना भ्रमणध्वनीवरून कोत्रेवाडीतील घनकचरा प्रकल्पाविरोधातील उपोषणकर्त्यांबाबत तातडीने कार्यवाही करा, असेही सांगितले. ३४ दिवस उपोषणाला बसलेल्या ग्रामस्थांची प्रशासनाकडून दखल घेतली जात नाही, हे दुर्दैव आहे. राजकारण काहीही असो, प्रशासनाकडून दखल घेतलीच पाहिजे असेही त्यांनी सांगितले. दोन दिवसात प्रशासनाकडून कोणतीही कार्यवाही झाली नाही तर शिवसेना स्टाइलने रास्तारोको करून हा प्रश्न धसास लावू, असा इशारा आमदार जाधव यांनी दिला. कागदोपत्री पुरावे ग्रामस्थांकडे असताना घनकचरा प्रकल्पाविरोधातील ग्रामस्थांना निर्णय देण्यास प्रशासनाकडून कोणतीच कार्यवाही का झाली नाही, असा प्रश्न त्यांनी उपस्थित केला.
लांजा तहसील कार्यालयासमोर १४ ऑगस्टपासून ग्रामस्थांचे बेमुदत साखळी उपोषण सुरू आहे. या उपोषणाचा ३४वा दिवस आहे. लांजामध्ये आजतागायत एवढे दिवस आंदोलन झालेले नाही. ग्रामस्थ उपोषणाला बसूनही नगरपंचायत, प्रशासन किंवा कोणतेही जबाबदार अधिकारी ग्रामस्थांच्या भेटीला आलेले नाही, हे अन्यायकारक आहे. त्यामुळे प्रशासनाने तातडीने तोडगा काढावा, असेही जाधव यांनी ठणकावून सांगितले.