शिरगावच्या तीन विद्यार्थ्यांची जिल्हा क्रिकेट संघामध्ये निवड

swt1621.jpg
91973
संकेत जाधव, कौशल तोडणकर, रुद्र सावंत

शिरगावच्या तीन विद्यार्थ्यांची
जिल्हा क्रिकेट संघामध्ये निवड
सकाळ वृत्तसेवा
देवगड, ता. १६ ः तालुक्यातील शिरगाव हायस्कूल आणि शिरगाव क्रिकेट अकादमीच्या तीन उदयोन्मुख खेळाडूंनी आपल्या चमकदार कामगिरीने एक मोठी झेप घेतली आहे. रुद्र सावंत, संकेत जाधव आणि कौशल तोडणकर या तिघांची सिंधुदुर्ग जिल्हा चौदा वर्षांखालील क्रिकेट संघात निवड झाली आहे. महाराष्ट्र क्रिकेट असोसिएशनतर्फे आयोजित होणाऱ्या इन्व्हिटेशन लीग क्रिकेट स्पर्धेसाठी ही निवड करण्यात आली.
या तिन्ही खेळाडूंनी आपल्या सातत्यपूर्ण खेळाने निवड समितीचे लक्ष वेधून घेतले. ग्रामीण भागातून क्रिकेटसारख्या खेळात जिल्ह्याच्या संघात स्थान मिळवणे ही शिरगाव हायस्कूल आणि शिरगाव क्रिकेट अकादमीसाठी गौरवाची बाब मानली जात आहे. या खेळाडूंच्या यशात त्यांचे प्रशिक्षक सुधीर साटम यांचे मोलाचे मार्गदर्शन आणि परिश्रम आहेत. या यशाबद्दल शिरगाव हायस्कूल संस्थेचे अध्यक्ष अरुण कर्ले, शाला समिती अध्यक्ष विजयकुमार कदम यांच्यासह मुख्याध्यापक शमसुद्दीन आत्तार यांनी त्यांचे अभिनंदन करून त्यांना शुभेच्छा दिल्या.
.......................
swt1622.jpg
91974
युवराज आसोलकर, निषाद मांडवे

जिल्हास्तर कुस्ती स्पर्धेत
युवराज, निषाद अव्वल
सकाळ वृत्तसेवा
आरोंदा, ता. १६ः क्रीडा व युवक सेवा संचालनालय महाराष्ट्र राज्य पुणे व सिंधुदुर्ग जिल्हा क्रीडा कार्यालय ओरोस यांच्या वतीने जिल्हास्तरीय कुस्ती स्पर्धा ओरोस येथे घेण्यात आली. या स्पर्धेत महात्मा गांधी विद्या मंदिर हायस्कूल सातार्डाच्या विद्यार्थ्यांनी यश मिळविले. यात १४ वर्षांखालील मुले (६८ किलो) गटात युवराज आसोलकर याने प्रथम, तर १७ वर्षांखालील मुले (८० किलो) गटात निषाद मांडवे याने प्रथम क्रमांक मिळविला.
या दोन्ही खेळाडूंची कोल्हापूर विभाग स्तरीय स्पर्धेसाठी निवड झाली. सर्व खेळाडूंचे व मार्गदर्शक शिक्षक, प्रशालेचे मुख्याध्यापक प्रशांत सावंत यांचे सातार्डा मध्यवर्ती संघ मुंबई पदाधिकारी, शाळा समिती पदाधिकारी, ग्रामस्थ, पालक, शिक्षक, शिक्षकेतर कर्मचारी व विद्यार्थी यांनी अभिनंदन करून पुढील स्पर्धेसाठी शुभेच्छा दिल्या.