सोन्याचे ४ लाखाचे दागिने सुनेने चोरले

सोन्याचे ४ लाखाचे दागिने सुनेने चोरले
सासूने केली पोलिसात तक्रार; न विचारता दागिने नेले
सकाळ वृत्तसेवा
लांजा, ता. १६ ः घरातील कपाटाच्या लॉकरमध्ये ठेवलेले आणि अंगावरील सोन्याचे एकूण ४ लाख १७ हजार रुपये किमतीचे दागिने चोरून नेल्याप्रकरणी सासूने लांजा पोलिस ठाण्यात सुनेवर गुन्हा दाखल केला आहे.
ही घटना लांजा तालुक्यातील पुनस येथे घडली आहे. याबाबत लांजा पोलिसांनी दिलेल्या माहितीनुसार, सविता विलास सावंत (६८ वर्षे, रा. पुनस सावंतवाडी) यांनी लांजा पोलिस ठाण्यात तक्रार दाखल केली आहे. सविता यांची सून दूर्वा विजेश सावंत (३०, रा. पुनस सावंतवाडी, सध्या रा. देवरूख वरचीआळी, ता. संगमेश्वर) हिने २८ ऑगस्ट ते ३ सप्टेंबर या कालावधीत आपल्या पुनस येथील राहत्या घरातून २ लाख २१ हजार रुपये किंमतीच्या ३० ग्रॅम वजनाच्या दोन सोन्याच्या चेन, १ लाख ४० हजार रुपये किंमतीच्या २० ग्रॅम वजनाच्या साखळीटाईप डिझाईन केलेले सोन्याचे ब्रेसलेट, २१ हजार रुपये किंमतीची तीन ग्रॅम वजनाची अंगठी आणि आणि ३५ हजार रुपये किंमतीची ५ वजनाची सोन्याची चेन असा एकूण ४ लाख १७ हजार रुपये किंमतीचा सोन्याचा ऐवज आणि अंगावर वापरत असलेले दागिने संमतीशिवाय चोरून नेले, असे तक्रारीत नमूद केले आहे. या प्रकरणी लांजा पोलिसांनी गुन्हा दाखल केला असून, पोलिस निरीक्षक निळकंठ बगळे यांच्या मार्गदर्शनाखाली महिला पोलिस हेडकॉन्स्टेबल जान्हवी मांजरे या तपास करत आहेत.