बांदा पोलिस ठाण्यामधील गणरायांना भक्तिमय निरोप

92226
बांदा ः पोलिस ठाण्याच्या गणरायांना मिरवणुकीने निरोप देण्यात आला. (छायाचित्र ः नीलेश मोरजकर)

बांदा पोलिस ठाण्यामधील
गणरायांना भक्तिमय निरोप
बांदा, ता. १७ ः ‘गणपती बाप्पा मोरया, मंगलमूर्ती मोरया, पुढच्या वर्षी लवकर या’ आदी घोषणांनी, फटाक्यांच्या आतषबाजीत व ढोल पथकाच्या गजरात येथील पोलिस ठाण्यातील श्री पाटेश्वर मंदिरातील एकवीस दिवसांच्या गणरायाला काल (ता. १६) सायंकाळी निरोप दिला. तेरेखोल नदीपात्रात रात्री उशिरा विसर्जन करण्यात आले. पोलिस अधिकारी व कर्मचाऱ्यांनी पारंपरिक वेशभूषेत विसर्जन मिरवणुकीत सहभाग घेतला. पोलिस ठाण्यात दरवर्षी २१ दिवस गणेशोत्सव साजरा करण्यात येतो. या कालावधीत विविध धार्मिक, सांस्कृतिक कार्यक्रम झाले. यानिमित्त १९ व्या दिवशी डबलबारी भजनी सामना झाला. शहरातील तसेच परिसरातील विविध मंडळे व सेवाभावी संस्थांनी भजने सादर केली. दुपारी महाप्रसाद झाल्यानंतर सायंकाळी श्रींची वाजतगाजत विसर्जन मिरवणूक काढण्यात आली. रात्री उशिरा तेरेखोल नदीपात्रात विसर्जन करण्यात आले. विसर्जन मिरवणुकीत सहायक पोलिस निरीक्षक गजेंद्र पालवे, उपनिरीक्षक शिवराज झांजुर्णे यांच्यासह पोलिस कर्मचारी, त्यांचे कुटुंबीय व ग्रामस्थांनी सहभाग घेत डीजेच्या तालावर ठेका धरला.
.......................
बांद्यात भाजपतर्फे उद्या
महिलांना रोजगाराचे धडे
बांदा, ता. १७ ः पंतप्रधान नरेंद्र मोदी यांच्या वाढदिवसानिमित्त सेवा पंधरवडा व विकास दिवसाचे औचित्य साधून भाजप महिला मोर्चा सिंधुदुर्गतर्फे महिला रोजगार मार्गदर्शन मेळावा आयोजित केला आहे. हा मेळावा शुक्रवारी (ता. १९) बांदा मंडलाचा आनंदी मंगल कार्यालय येथे दुपारी ३.३० वाजता होणार असून, महिलांसाठी मार्गदर्शक म्हणून राष्ट्रीय सदस्य, लघू, सूक्ष्म व मध्यम उद्योग मंत्रालयाचे विजय केनवडेकर मार्गदर्शन करणार आहेत. या कार्यक्रमास भाजप जिल्हाध्यक्ष प्रभाकर सावंत, जिल्हा बँक अध्यक्ष मनीष दळवी, जिल्हा सरचिटणीस महेश सारंग, जिल्हा संयोजक प्रसन्ना देसाई, जिल्हा उपाध्यक्ष प्रमोद कामत, बेसिकचे मंडळ अध्यक्ष, महिला मोर्चा मंडळ अध्यक्ष तसेच महिला मोर्चाच्या पदाधिकाऱ्यांची उपस्थिती लाभणार आहे. या मार्गदर्शनाचा महिलांनी लाभ घ्यावा, असे आवाहन भाजप महिला मोर्चा जिल्हाध्यक्षा श्‍वेता कोरगावकर यांनी केले आहे.