-सततच्या पावसाने हळवे भातपीक धोक्यात

पावसाने हळवे भातपीक धोक्यात
वन्यप्राण्यांचाही त्रास ; शेतकरी चिंतेत
सकाळ वृत्तसेवा
संगमेश्वर, ता. २३ ः सतत कोसळणाऱ्या पावसामुळे सध्या तयार भातशेती धोक्यात आली आहे. गणपतीनंतर हळवी भातशेती कापण्यायोग्य झाली होती. गणपती उत्सवानंतर वातावरणातदेखील बदल पाहायला मिळत होता; परंतु अगदी पुढच्या चारच दिवसात पुन्हा पाऊस सुरू झाल्याने तयार भातशेती पावसात भिजत पडली आहे.
गेले पाच महिने बरसणाऱ्या पावसाने भातकापणीवेळी ठिय्या मांडल्याने शेतकरी चिंतेत आहेत. सततच्या वाढत्या पावसामुळे ओढ्यांसह नद्यांचे पाणी लक्षणीय वाढले आहे. भातशेतीत पाणी तुंबले आहे. उघडीप मिळत नसल्याने भातकापणी कशी करायची, या चिंतेत सध्या शेतकरी पडला आहे. भातशेती तयार असल्याने रात्री डुक्करांकडून भातशेतीचे मोठे नुकसान होत आहे. भाताच्या लोंबी खाऊन शेतात लोळून भातशेती जमीनदोस्त झालेली पाहायला मिळत आहे. संगमेश्वर तालुक्यात बहुतांश शेती ही डोंगराळ भागात असल्याने डुक्करांकडून शेतीच्या होणाऱ्या नुकसानीचे प्रमाण मोठे आहे. असाच पाऊस काही दिवस बरसत राहिला तर हळव्या पिकापाठोपाठ उशिरा तयार होणारी महान भातशेतीदेखील संकटात येण्याची चिन्ह आहेत.