मटण-मच्छीमार्केटच्या दुरूस्तीचे काम थांबवा

मटण-मच्छीमार्केटची दुरूस्ती थांबवा
ःइनायत मुकादम ः मुख्याधिकाऱ्यांना निवेदन
सकाळ वृत्तसेवा
चिपळूण, ता. २४ ः येथील पालिकेकडून सुरू असलेले मटण-मच्छी मार्केट इमारतीतील दुरुस्तीचे काम अयोग्य आहे, असा आक्षेप माजी नगरसेवक इनायत मुकादम यांनी घेतला आहे. हे काम तातडीने थांबविण्यात यावे, अशी मागणी एका निवेदनाद्वारे मुख्याधिकारी विशाल भोसले यांच्याकडे केली आहे.
पालिका प्रशासनाला दिलेल्या निवेदनात म्हटले आहे की, सुमारे २० वर्षे पडीक इमारत नव्याने दुरुस्त करून व्यावसायिक गाळ्यांची लिलाव प्रक्रिया राबविण्याचे प्रयत्न पालिकेने सुरू केले आहे. मात्र हे काम निकृष्ट दर्जाचे आणि नियमबाह्य पद्धतीने सुरू करण्यात आले आहे. स्ट्रक्चरल ऑडिट अहवालात दिलेल्या सूचना व उपाययोजना न पाळता रोजंदारीवरील अकुशल मजुरांकडून रंगरंगोटी व दुरुस्ती सुरू आहे. कोणतेही अंदाजपत्रक वा निविदा प्रक्रिया न करता वार्षिक ठेक्याच्या दरपत्रकानुसार बेकायदेशीर कामे सुरू असून, त्यामुळे जनतेची दिशाभूल होत आहे असा आरोप त्यांनी केला आहे.