क्राईम

रेल्वेप्रवासात
प्रवाशाचा मृत्यू
रत्नागिरी ः कोकण रेल्वेच्या सिंधुदुर्ग एक्सप्रेसमध्ये बेशुद्धावस्थेत आढळलेल्या प्रवाशाला उपचारासाठी जिल्हा शासकीय रुग्णालयात दाखल केले होते. तेथील वैद्यकीय अधिकाऱ्यांनी तपासून मृत घोषित केले. महेश रघुनाथ साळुंखे (वय ५५, रा. अशोकनगर, भांडूप-मुंबई) असे मृत प्रवाशाचे नाव आहे. ही घटना गुरूवारी (ता. २५) दुपारी एकच्या सुमारास निदर्शनास आली. पोलिसांकडून मिळालेल्या माहितीनुसार, महेश साळुंखे हे सिंधुदुर्ग एक्स्प्रेसने सिंधुदुर्ग ते मुंबई असा प्रवास करत असताना अचानक ते बेशुद्ध झाले. याबाबत रेल्वे पोलिसांनी येथील लोहमार्ग पोलिस ठाण्यात कळवले. येथील रेल्वे पोलिसांनी रत्नागिरी रेल्वेस्टेशन वैद्यकीय अधिकाऱ्यांकडे तपासणी करून अधिक उपचारासाठी जिल्हा शासकीय रुग्णालयात दाखल केले होते. तेथील वैद्यकीय अधिकाऱ्यांनी महेश साळुंखे यांना दुपारी अडीचच्या सुमारास मृत घोषित केले. त्यांचा मृतदेह उत्तरीय तपासणीसाठी जिल्हा रुग्णालयात ठेवण्यात आला असून, रेल्वे पोलिस ठाण्यात याबाबत नोंद करण्यात आली आहे.

नेवरे येथील
वृद्धाचा मृत्यू
रत्नागिरी ः तालुक्यातील नेवरे येथे घराच्याबाहेरील परिसरात वृद्ध मृतावस्थेत वृद्ध आढळला. उत्तरीय तपासणीसाठी त्याचा मृतदेह जिल्हा शासकीय रुग्णालयात दाखल करण्यात आला आहे. दिवाकर बाळकृष्ण सुर्वे (वय ७०, रा. भंडारपुळे मुळ ः नेवरे, रत्नागिरी) असे मृत वृद्धाचे नाव आहे. ही घटना गुरूवारी (ता. २५) दुपारी निदर्शनास आली. पोलिसांकडून मिळालेल्या माहितीनुसार, दिवाकर सुर्वे हे मोलमजुरी करत होते. गुरूवारी दुपारी ते मृतावस्थेत आढळले. नातेवाईक सुरेश एकनाथ सुर्वे यांनी ग्रामीण पोलिस ठाण्यात माहिती दिली. पोलिसांनी सुर्वे यांचा मृतदेह उत्तरीय तपासणीसाठी जिल्हा शासकीय रुग्णालयात दाखल केला आहे.

निवळीत हातभट्टीवर
पोलिसांचा छापा
रत्नागिरी ः तालुक्यातील निवळी-बावनदी पुलाखाली पोलिसांनी हातभट्टी दारूविक्रीवर कारवाई केली. या कारवाईत ९४० रुपयांची ९ लिटर दारू जप्त केली. संशयिताविरुद्ध ग्रामीण पोलिस ठाण्यात गुन्हा दाखल करण्यात आला आहे. जयवंत जनार्दन रेवाळे (वय ४२, रा. तळेकांटे, रेवाळेवाडी, ता. संगमेश्वर) असे संशयिताचे नाव आहे. ही घटना बुधवारी (ता. २४) सायंकाळी निदर्शनास आली. पोलिसांकडून मिळालेल्या माहितीनुसार, संशयित विनापरवाना हातभट्टीची ९४० रुपयांची ९ लिटर दारू विक्रीसाठी स्वतःकडे बाळगलेल्या स्थितीत सापडला. या प्रकरणी पोलिस कॉन्स्टेबल लक्ष्मण कोकरे यांनी ग्रामीण पोलिस ठाण्यात तक्रार दिली.

गवळीवाडा येथील
प्रौढाची आत्महत्या
रत्नागिरी ः शहरातील गवळीवाडा येथील प्रौढाने गळफास घेतला. नातेवाइकांनी त्यांना जिल्हा शासकीय रुग्णालयात दाखल केले होते. तेथील वैद्यकीय अधिकाऱ्यांनी त्यांना तपासून मृत घोषित केले. प्रदीप प्रकाश रजपूत (वय ४४, रा. दत्तमंदिरजवळ, गवळीवाडा, रत्नागिरी) असे गळफास घेतलेल्या प्रौढाचे नाव आहे. ही घटना बुधवारी (ता. २४) घडली. पोलिसांकडून मिळालेल्या माहितीनुसार, घरात असताना रागाच्या भरात प्रदीपने घरातील हॉलमधील फॅनच्या हुकाला नायलॉनच्या साडीने गळफास घेतला. नातेवाईक व शेजाऱ्यांनी त्याला उपचारासाठी जिल्हा शासकीय रुग्णालयात दाखल केले. तेथील वैद्यकीय अधिकाऱ्यांनी त्यांना तपासून मृत घोषित केले. शहर पोलिस ठाण्यात आकस्मिक मृत्यूची नोंद करण्यात आली आहे.